[عاصم المنشاوى]

الأستاذ الفنان / على ثلاثة

رغم ان محمد عبد الوهاب هو اللى لحن وغنى "من قد أيه كنا هنا"....لكن أنا شايف ان "أمينة فاخت"...أدتها بطريقة رائعة ....أسمعها وقوللى رأيك....

اخى العزيز
هى طبعا مطربة رائعة بس الطبقة عالية عليها شوية .. يعنى النغمات العالية بتجيبها وهى على آخر مساحتها الصوتية بعكس عبد الوهاب قال كلمة البعد مثلا وتحس ان لسه عنده عشر نغمات كمان فوق ..
الملحوظات ان اللى كاتب النوتة كاتبها كويس من لحن عبد الوهاب يعنى ما اخترعش فيها من عنده وهى كمان ماخرجتش عن اللى عامله عبد الوهاب يعنى عملت حركتين من عندها بس مش وحشين اكيد لازم تحط بصمتها .. بعكس اصالة مثلا يعنى انا مش بستحمل اسمعها نص دقيقة لأنها فى كلمة تحط عربتين تلاتة .. اصل اقول لك ايه خطورة ان حد يغنى اغنية لعبد الوهاب زى دى مثلا ان اللى بيسمعوها عشاق عبد الوهاب مش اى حد عادى ودول فى سمعهم بيبققوا فظاع يعنى طبعا حافظين عبد الوهاب بالنفس .. واى تغيير تلاقى على طول ينزلوا التحرير ..
اروع مثال على الاجادة اغنية هان الود تسمعها من عبد الوهاب وشوف الابداع وكان تسجيل استوديو يعنى ما عملش اعادات لأنها كانت لفيلم منتهى الفرح ومحدد الوقت بخمس دقائق لكن تعالى اسمعها من فايزة عملت ها فى حفلة وقعدت تعيد على مزاحها هنا نقول المطربة عملت لحن عبد الوهاب بإبداع تانى غير اللى عمله عبد الوهاب مش بوظت اللحن .. اشمعنى هان الود لأنو عبد الوهاب مسجله بفرقة .. لكن لو انت سامعه مسجله ع العود بعدين تسمعه من مطرب على فرقة مش حايبقى فيه خالص للمقارنة لأن ده اداء وده اداء تانى
مع اطيب تحياتى عادل صموئيل