قال :
-------------------
قال : مصر دى أم الدنيا .. وهتبقا يوم قد الدنيا
لك حق تحلم وتلاغى .. عقلك حمانا من الباغى
ولك بهية بتناغى .. وبتفتخر بك فى الدنيا
ونقول دى مصر ام الدنيا .. وهتبقا يوم قد الدنيا
بهية طول عمرها شابة .. أعداء كتير عدوا عليها
آدى التاريخ عمره ما خبى .. كله اندحر أو داب فيها
ووشها ما اتغير يوم .. ولا همها فى سماها غيوم
وسمانا تصفا وتيجى نجوم .. عشان تنور للدنيا
وتقول : دى مصر ام الدنيا .. وهتبقا يوم قد الدنيا
وجم فى فترة قالوا شابت .. وبقت عجوزة آ يا عينى
وآدى حكامها ما سابت .. فيها أى حاجة بتشجينى
والشعب جا قام بالثورة .. ورا الظالم عينه الحمرا
ما نفعت معاه أى مناورة .. دا شعب مصر ام الدنيا
علشان دى مصر ام الدنيا .. وهتبقا يوم قد الدنيا
وجات جماعة حرامية .. ضحكوا علينا بإسم الدين
خونة ومفيش وطنية .. وهمهم بس التمكين
مش بس هيبيعوا أراضينا .. يبيعوا كمان يشتروا فينا
والرب بعنايته حامينا .. علشان دى مصر أم الدنيا
وهتبقا يوم قد الدنيا .. يا مصر يا ام الدنيا
جا مننا واحد مخلص .. على كفه روحه وأحبابه
علشان كدا اخترناه ريس .. يسلم لنا يارب شبابه
ويعينه يبنى ويعمر .. سواعدنا وياه بنشمر
علينا مش جاى يتأمر .. بيقول : دى مصر ام الدنيا
وهتبقا يوم قد الدنيا .. يا مصر يا ام الدنيا
------------------------------------------
هانئ الجمل