[عادل صموئيل]

احبائى
اقدم لكم لحن من العيار التقيل جدا او ممكن تسميه عقدة العقد المعقدة تعقيدا , هو انا مش عارف الاخ العزيز نور الصباح طلبه ليه .. تحفة عبد الوهاب

بفكر ف اللى ناسينى

اولا انا كنت متردد اكتبه من زمان عشان انه صعب جدا وماحدش ممكن يعزفه وثانيا انو حياخد معاكم وقت لأنى مش ضامن ظروفى الاسبوع الجاى عشان الانتخابات قلت اشغلكم بحاجة .. هو بالطبع فيه اجزاء ممكن اى حد منكم يعزفها زى من اول المذهب ولحد دخول الكوبليه الاول لحد التقاسيم .. ونقف عند التقاسيم انا ماكتبتهاش لن التقاسيم مش بتتكتب انا حاولت اكتب ابتدأ ازاى بعدين زى فى الشغل كنا بنكتب تقاسيم وفى البروفات الملحن بيحدد حيقولها ازاى واحنا بنحفظها كده ... فيه حاجة تانية سبب يعنى ليه مش بنتكب التقاسيم وبالذات بتاعة المعالقة غير انها بتخالف قواعد العلامات الايقاعية يعنى النوار مش نوار والبلانش مش بلانش بتبقى اقصر او اطول حتة .. ان المطرب لما يكون عملاق وعندكم مثلا لو سفتم اللى لسه عايشين لحد دلوقتى يعنى صباح فخرى مثلا .. افرض عمل عشر بروفات وفى التقسيمة كل يوم كان مثلا بيخرج من البياتى على حجاز او صبا وخلاص حفظناها كده .. ممكن ييجى ساعة التسجيل ييجى لو خيال تانى يعنى يخرج م البياتى على حاجة تانية خالص .. ومن هنا انا لو بعزف معاه بتابعو بودنى وامشى زى ما بيقول حاسلطنه اوى .. لكن لو بقرا من النوتة حقرفه فى عيشته واخليه يبوظ خالص لسبب انا بدخله ع المقام اللى هو مش عايز يقوله دلوقتى بحدده يعنى .. والمطرب العملاق حاجة زى كده تطير كل اللى ف مخه .. طيب ييجى واحد يسألنى يقول لى طيب ليه كتبت اللى فى الكوبليه التانى اقول لك ده حاجة تانية ... ده ادليب من صميم تلحين اللحن يعنى ثابت لو غناه فى عشرين حفلة ... اقول لك سر خطير كمان ( وده للمدونين الجدد اولادنا يعنى ) شوف اللازمة السطر الاول فى الصفحة الاخيرة .... لو الملحن زرع لك لازمة زى دى فى الجزء اللى بنسميه ادليب او تقاسيم يعنى حطها وسط الغنا زى الخازوق كده يبقى هنا وجوبا لازم تكتب اللى قبلها واللى بعدها لكن لو تلاحظ فى الكوبليه الاول .. هو قال جملة وعليها لازمة محددة بعدين جملة تانية عليها لازمة محددة بعدين تلاحظ انو ابتدا يسلطن بالعود ويسحب الفرقة وراه يعنىبيدخل نفسو فى المقامات ... هنا اخطر شىء الفرقة تسمعو اوى اوى اوى ماتشغلش نفسها بحاجة غيره ... طبعا هو فيه اجزاء صعبة جدا بالذات فى الكوبليه التناى بس مالهاش تبسيط يعنى تفقد شكلها ... اما المقدمة مشكلتها حاجة عشان لو انت عزفتها قدام حد ويتمتع بيها هى اولا بتحتاج انك تتفهم فروق السرعات يعنى بيبتدى بسرعة معينة بعدين بيسرع بعدين يبطىء بالطبع ما اقدرش اكتب فوق كل مازورة سرعة جديدة ( ده يلخبط ) بس انا اعتقد انهم وهم بيسجلوها كان الموزع بيمعلها مع الفرقة جملة جملة يعنى يحفظهم الاحسا حتى لو كان قدامهم نوتة .. وهى انت لما تعيش فى المقجدمة بعدين تسمع عبد الوهاب لما بيدخل على الايقاع فى بفكر ف اللى ناسينى تحس من نكهة الاستدوديو انها متسجلة فى يوم تانى .. بمعنى ان المقدمة دى عشان تتسجل محتاحة عشر ساعات تكون الفرقة محتاجة تدخل الانعاش او تاخد حقن كوراع .. لذلك الملحن الذكى بيبقى عارف ان البنزين بتاعهم خلص وييجوا يوم تانى يكملوا باقى الاغنية وهم بصحتهم ( بس خلى بالك هم كده بيقبضوا لحنين يعنى كانها اغنيتين ) .. اما الملحن الحمار عشان يوفر الفلوس يخليهم يسجلوها كلها فى يوم واحد وطبعا اولا حايقطع قلبهم وثانيا حايطلع نص الشغل الاخير زى الزفت لان العازف بيكون استهلك .. وعلى سبيل المثال احنا اغنية انده عليك لوردة سجلناها على يومين طوال اوى .. فيه فى اللحن ده كمان حاجة ملفتة ان عبد الوهاب لما تركز فى غناه تحس انو منفعل اوى كانه بيبكى مش عارف ليه .. انابسمع اللحن ده من يوم ما كنت طفل ما اخدتش بالى من التأثر ده إلا لما جيت ادون اللحن لأنى بالطبع بسمع كل مازورة 60 مرة ..
الخلاصة ان كل عملاق كل كذا لحن بيعمل لحن لنفسه يعنى مش ممكن حد غيره يقوله بمعنى ان الحان كتير ممكن غيره يقولها حلو لكن اللحن ده مستحيل يعنى على طول تحس بالفرق
مع اطيب تحياتى