[muhamadibra]

اريد ان ابدي اعتراض علي تفسير المايسترو لموقف الحمهور من الفنان والذي ينطبق فعلا علي العمالقة - واعتراضي ان الامر المادي له نصيب في الموضوع اما في حالة استاذنا شلال الكرم والعطاء بدون اي مقابل الفن من اجل الفن ولامتاع كل المتابعين دون اي مقابل سوي كلمات الاستحسان البسيطة والقليلة علي المجهود العظيم الذي يقوم به هذا العبقري - عذرا الامر هنا مختلف اعتقد انه يرتبط بأداء رسالة ما وتحدي شخصي ونحن الكسبانين في النهاية - بالتوفيق دائما
د محمد ابراهيم

اخى العزيز اشكرك على كلامك الجميل
اى شىء حلو انا بقدمه او انت بتشوفه منى بيبقى لو خلفيات برضو ... العمالقة برضو ده من ضمن اللى اتعلمته منهم
يعنى افضفض عشان فيه ناس نفسى اضربهم من اللى بيغنوا دلوقتى .. لو انت شفت قصى حياة اى حد من المعالقة ماطلعش عملاق مرة واحدة ولكن كان موهوب وسط عشرات بل مئات الموهوبين ولكنه كافح واكرر كافح واتمرمط واتبهدل وجاع وموهبته الخارقة هى اللى رفعته فوق .. كان كل واحد منهم عايز يوصل فنه للناس مافكرش حياخد كام وحايركب عربية ايه ويسكن فى قصر ايه .. هو كافح وربنا اعطاه .. اللى انا شفته بعينى عشرات المرات ماحدش قالى يعنى .. لما بييجى انتاج اغنية ما لعبد الحليم مثلا .. فيه فلوس طبعا الفلوس دى بتدفعها الشركة المنتجة للأغنية بتتضمن شراء الكلمات والتلحين واجر المطرب واجر الفرقة على البروفات لو طويلة ( يعنى لو 3 او 4 بروفات كانوا بياكلونا ) لكن لما يكون خمسين بروفة بتبقى البروفة باجر .. وبعدين اجر الفرقة فى تسجيل اللحن فى الاستدوديو واجرها لما تعزف فى الحفلة .. ده بتدفعه الشركة المنتجة واول عائد مادى بتقبضه بيبقى من ان الاذاعة بتاخد نسخة من التسجيل بفلوس طبعا .. وتانى عائد لما الحفلة تتذاع الاذاعة بتدفع والتليفزيون بيدفع بس لحد عبد الحليم كانت الفلوس دى كلام فارغ يعنى الفلوس زمان كانت قليلة .. المهم كانت فيه تسعيرة يعنى المؤلف فلان بياخد كذا والملحن كذا وطبعا بتختلف من كبير اوى لمتوسط يعنى مثلا الموجى مش زى عبد الوهاب .. واجر المطرب .. اجر الفرقة كان على اساس الفرقة الماسية زى ماهى 25 عازف بيقبضه احمد فؤاد حسن طبعا بياخد نصه وبيوزع الباقى ع الفرقة وطبعا فيه اختلاف فى الاجور .. بييجى عبد الحليم عايز يعملشغل احلى عايز يضيف مثلا خمس او عشر كمنجات من بره الفرقة وعشرين كورال على العشرة العاديين بتوعنا وانت بتشوف المظاهرة اللى فى الحفلة .. هننا الشركة مش ملزمة تدفع الفرق ده وطبعا بيبقى مبلغ بالذات عشان الخمسين بروفة .. ومش معقول احمد فؤاد حسن حايوزع المبلغ بدل ما 25 على 45
هنا عبد الحليم بيدفع الفرق من جيبه الخاص .. يعنى ممكن يبتلع اكتر من نصف اجره بس عايز يعمل فن للذكرى والتاريخ بغختصار يعنى اللى حوشه زمان فى الاوائل صرف منو كتير اوى اوى فى الاواخر
تعالى بقى لمقاصيف الرقبة اللى بيغنوا دلوقتى قولى عمرو دياب ولا تامر حسنى كافح ؟؟؟ ولا اتبهدل واتمرمط زى فريد الاطرش مثلا ؟؟؟ ده بقا نجم فى سنة وبيقبضوا ملايين بعدين شوف غانى المعالقة بتعيش اد ايه واغانى دول ببتعيش اد ايه لها مدة صلاحية لحد ماتطلع اغنية تانية تلغى اللى قبلها او يطلع واحد سباك فاشل يغنى يبقى ىهو الموضة .. انا ماتهمنيش الفلوس .. يعنى انا من خمس ايام كان معايا 7000فى جيبى جنيه فاضل منهم 7 جنيه .. بس انا مستور والحمد لله .. وللعلم انا كان ممكن يبقى عندى ملايين وواحد زيى سهل اوى اوى اروح دولة خليجية واعمل شغل وانت فاهم .. بس انا بحب حاجة خطيرة اسمها الصدقة الجارية يعنى اتمنى بعد ما اموت بكتير شوية واحد يستعمل نوتة من بتوعى ويقول الله يرحمو الراجل ده كان كويس .. دى بتقدر بأكتر من كنوز الدنيا لن لو عندك مليار جنيه مش حتاخدو معاك وانت ماشى ولكن حتاخهم بطريقة تانية بعمل صالح ممتد على طول .. بس خلاص
مع اطيب تحياتى عادل صموئيل