[thesherifalaa]

فقط اردت ان اسال سؤال
هل المطربيين مثل صفوان بهلول و احمد جمال الذين غنوا الموال و هم يعزفونة علي العود اتوا باللحن سماعي ايضا ؟

اخى العزيز
انا زى ماقلت لك انا عزفت مع جميع فنانى الزمن الجميل وعارف كويس اوى بيشتغلوا ازاى ... يعنى ايه موال ؟؟
يعنى المطرب بياخد كلمات وهو بنفسه بيلحنها مش الملحن بيلحنها له .. واللحن ده 99% يبكون ارتجال على المسرح يعنى هو بيبقى حافظ الكلام اوى وبيكون محضر يدخل ازاى .. وفى الحفلة حسب لما يكون الجمهور حلو بيسمع وربنا يفتح عليه يروح قايل ... وانت لو مشيت ورا المطرب هو هو فى 3 حفلات وحيقول نفس الموال تلاقيه قالو ب 3 طرق مختلفة لأن الموال والتقاسيم مش بتتحفظ ولكن بترتجل ... يعنى عدنك مثلا محمد عبد المطلب كان من ملوك الموال ويمكن اكتر من عبد الوهاب فى الموال بالذات كان لما الجمهور يكون حلو يروح بادى موال انا عارف كلامه ويقعد يتوغل ويروح مقامات مختلفة ويروح قافله بياتى عشان يبتدى اغنية فى البياتى ... ومرة تانية ابتدا نفس الموال وقعد يتوغل فى المقامات واستعرض كل عضلاته وراح قافله حجاز وابتدا مذهب اغنية من الحجاز وهكذا
والشىء الرئيسى اللى لازم تعرفه ايه الفرق بين الاغنية الموزونة اللى على ايقاع بتبقى محسوبة 100% من الناحية الموسيقية يعنى انا ما اقدرش اطول ولا انقص حرف الجملة تبوظ او تتلخبط .. وبالطبع لازم اكون ماشى على العلامات الموسيقية المحددة يعنى النوار بزمنها والبلانش بزمنها وهكذا
اما الموال لما بيغنى مش بيلتزم بطول العلامات المحدد يعنى البلانش بتبقى اطول شعرة والنوار ممكن تكون اقصر او اطول شعرة طيب دى تتكتب ازاى ؟ ايوه ممكن تتكتب بس ماحدش حايعرف يقراها لأن حاتدخل فى الموضوع تريبلات كروش وبلاوىحايبقى حتى شكلها يخوف العازف
اقول لك كمان انا عزفت فى الفرقة الماسيية عشرين سنة كانت النوتة مكتوبة قدامنا لما ييجى جزء فيه المطرب عايز يقول موال او فى البروفات اتفقنا انه حيقول موال فى المكان ده بيتكتب كلمة واحدة : موال واحنا بنتابع مع المطرب زى ما بيقول نطلع وننزل ماه نسلطنه يعنى وهكذا وصلت المعلومة
مع اطيب تحياتى عادل صموئيل