[عادل صموئيل]

احبائى
من كل قلبى اشكر كل الاخوة الاحباء اللى تقدموا بالمعايدة فى عيد الميلاد المجيد
واحنا كلنا اخوات يعنى عيدنا عيكم وعيدكم عيدنا
كان زمان المسحيين بيحتفلوا مع بعض فى الاعياد وحتى ربنا جابها مرة من ييجى 45 سنة ان جه يومعيد ميلاد السيد المسيح بيوافق المولد النبوى الشريف وكان فيه الصفحة الاخيرة فى جريدة الاهرام تهنئة انا مش ناسيها من 45 سنة يعنى العنوان مولد عيسى ومحمد وتحتها التاهانى من كل الدنيا كانت جميلة اوى

وانا اتقدم بجزيل الشكر للسيد رئيس الجمهورية المستشار المحترم عدلى منصور على لفتته الكريمة انه ذهب الى الكاتدرائية المرقسية بالعباسية شخصيا وقام بتهنئة قداسة البابا بالعيد والحدث ده ماحلش من خمسين سنة يعنى كان الرؤساء بيرسلوا مندوبين فقط
يعنى ما اقدرش اوصف لكم شعور كل قبطى بالسعادة لأننا بينى وبينكم فيه ناس يعنى لما تطلع مجموعة تقول لك حرام انك تعيد على الاقباط فى عيدهم وانا متأكد ان الدين الاسلامى الجميل مقالش كده .. يعنى سيدنا محمد لو كان فى المكان اللى هو فيه كان فيه اقباط اكيد كان حايعيد عليهم ودى مالهاش دعوة بالعقيدة ولكن لها دعوة بالاخلاق والمعاملة يعنى انا درست الدين الاسلامى كويس جدا واى مرة فى التليفزيون اشوف شيخ محترم فلا التليلفزيون بقعد اسمعه لحد ما يخلص ... يعنى اللى بيتمسحوا فى الرسول وسلوكيات الرسول يعنى لو انت اتعملت من الرسول 7 حاجات محددة وجت قدامك حالة الرسول ماقلش عليها بالتحديد او ماجاتش مناسبة المفروض انت بتتصرف من السلوكيات اللى اتعلمتها من الرسول ده هو الدين الصح .. يعنى مثلا قصة اليهودى اللى كان كل يوم بيرمى الزبالة بتاعتو امام بيت الرسول ( لو كان دلوقتى كان الاخوة بالطبع قتلوه ومثلو بجثته ) ولكن التسامح بتاع الرسول الكريم كان بيخلى حد يشيل الزبالة وماعمل لوش حاجة وفى بعد فترة كذا يوم اليهودى انقطع عن انو يرمى الزبالة الرسول سألأ عليه فين الاخ ... قالوا لو انه مريض .. قام الرسول راح يزوره والتهودى اتكسف وحس ان اخلاق الرسول الكريمة دى هى اخلاق الاسلام وبعد كده اعلن اسلامه عارفين الحكايات دى يا كل المسلمين
طيب لو فيه يوم عيدعند اليهودى ده مثلا مش اكيد الرسول كان حيقول له كل سنة وانت طيب ؟ يعنى كلمة طيبة مش حاتخسر حاجة مش كده ولا ايه ؟؟؟؟؟؟ لأن فيه حاجة اسمها العين بالعين يعنى مثلا لو واحد هندوسى وواحد بوذى ( بمنتهى الحياد ) لو يوم عيد واحد منهم ماعيدش عليه اكيد يوم العيد بتاع التانى مش حايعيد عليه الحركة دى ممكن تعمل جفوة بينهم وهم جيران ساكنين فى عمارة واحدة بعدين يبطلوا كلام اصلا و مراتو ماتكلمش مرات التانى وهلم جر ...
مع اطيب تحياتى