[عادل صموئيل]

اخى العزيز اشكرك على المعايدة
واشكرك على الذكريات اللى تشبه ذكرياتى
اما عن الكمنجات .. هو كان زمان فى العشرينيات كان الفرقة الموسيقية تخت شرقى يعنى كلهم على بعضهم كانو خمس عازفين .. لكن لما ظهر عبد الوهاب ابتدت الفرقة تكبر ولما وصل العدد الى اكتر من 7 كمنجات هم مع بعض بيبقى صوتهم بناتى شوية لذلك اضيف التشيللو يعمل بالانس فى الصوت ثم اضيف شيللو تانى لحد ماوصلنا ل 12 كمنجة وعليهم 3 شيللو وكان زى ماقلت لك وظيفة الشيللو الاوسط البيتسكاتو

وانت لو عازف كمان شطاطر ولوحدك فى مجموعة بتقول بمستواك ولكن لو جنبك كذا عازف حلو بتقول اكتر من مستواك كذا مرة لأن بيطلع شىء نفسى خطير اسمو السلطنة .. يعنى انت لو ولحدك لازم تشيل الشغلة كلها مش حايبقى عندك وقت تلعب اوتقول حلية حلوة لن ممكن المطرب يقع لنو بيغنى على الكنجة لكن لما يكون كذا عازف وانت نفسك تقول حاجة تبقى شىء مربح للشغلة ..وبعدين سر طرب زمان ان الكذا كمنجة الحلوين اوى لما يتسلطنوا ويطلعوا ابداعهم بيبقى شىء يفوق الخيال وهو من اهم مميزات فرقة ام كلثوم لن مفيش نوتة وبتعتمد على الحفظ والمواهب وتلاحظ اعلى اعلى درجات السلطنة والانسجام لما الفرقة تعزف لازمة الانتظار مرتين وام كلثوم ماتدخلش تغنى والفرقة تعزف الازمة كذا مرة تلاقى كل اعادة فيه حاجة مختلفة لأن الكمنجات بتبقى وصلت لأقصى درجة من السلطنة والابداع والحكاية ى بتعمل مشكلة فى المونتاج يعنى الازمة يتتعاد 6 مرات وحرام انك تقص من الكنوز دى وترمى
اما عن اولاد عظمة انت طبعا كنت اعرفهم شخصيا واقول لك حاجة يمكن انت اول مرة تسمعها .. عصمت عباس عازف الكونترباص المبدع لما كبر شوية لعب بيز جيتار .. وللعلم كان احلى بيز جيتار سمعتو فى حياتى لنو بيلعب على البيز جيتار نفس اللى بيقولو على الكونترباص يعنى زى ما انت فاهم اصول العزف على الكونترباص الشرقى وشرب من ابوه كتير جدا جدا .. جبناه مرة فى الفرقة الماسية فى اغنية فايزة ياما انت واحشنى عزف معانا بيز جيتار وكان مذهل يعنى نسى تشوف الاغنية دى وتسمعها بعد ماقلت لك وتركز مع البيز جيتار بس هى كانت فى الاغنية دى بس ما اتكررتش لأن جايز والله اعلم يكون عبد الحكم اتضايق لأنو حس انو بيلغيه كده يعنى الكونترباص بيبقى صوته جوا الفرقة وممكن يكون الميكروفن بتاعه مش مركز او مش مضبوط لكن البيز جيتار معاه زمان كان امبليفاير كبير اد التلاجة ال 10 قدم لأنو لو اتحط فى امبليفايزر بتاع الاورج او الجيتار يفرقعه يعنى بياكل الجو
ومع الاسف مافيش واحد بيز جيتار حلو شرقى فى مصر كلهم بيقولوا اى حاجة مقرفين يعنى يعنى حتى او اتكلت عليه فى الحرف اللى مع الدوم اول المازورة ممكن زمنه مش حلو وبيوقع الايقاع غير البلاوى يعنى انت بتقول مى بيمول وهو بيديك رى او دو دييز وهو يديك دو وبالطبع لما يكون المقام شرقى ومعندوش سيكاه اللى زى عصمت عباس بيتصرف يعنى بيديك حروف تجمل البياتى اوى مش تدمره
وعبده داغر كمان كان صديقى وهو من عائلة كلها بتوع كمنجة يعنى اخوه عيسوى كان عازف ودلوقتى بيشتغل بيصلح كمنجات فى بيتو فى عابدين ولهم اخ ثالت اسمو خضر داغر فاتح محل الات موسيقية فى شارع محمد على فى الحارة اللى على ناصيتها هوة التجارة بس الكارثة انى بحكى لك عن حاجات كلها اندثرت يعنى كل محلات الموسيقى ف شارع محمد على قفلت حتى قهوة التجارة اللى كانت جزء من تالايخ الفن فى مصر قفلت وتتصور انا عندى مشكلة خطيرة او كارثة انى دلوقتى لو عايز املا شعر قوس ما الاقى حد كويس بضطر اشترى قوس صينى تمنو خمسين جنيه وطبعا قوس من وزن قوس المحترفين بس المذطر بقى يعنى بشتغل بيه شوية ( فى البيت طبعا ) وبرميه ...اما عائلة الجرشة هو كان زميلى فى الكلية بس هو اتاخر كتير اوى وكانت معايا نفس دفعتى اختو كان اسمها فاطمة الجرشة وبعدين بقت معيدة وزمانها بقت دكتورة وهو بيقربوا لعبود عبد العال
زمان كان الموسيقى الشاطر بيقاس حافظ ايه للعمالقة يعنى انا شفت واحد عازف جيتار لازم اقل شىء يكون حافظ صولوهات ام كلثوم مثلا لقيته مش حافظ يبقى لايساوى شىء ... دلوقتى الذوق بتاع بعض المستمعين بقا زبالة بس برضو فيه ناس لسه بتسمع واولادهم بيسمعوا بدليل حفلات فى الاوبرا ليها رواد منتظمين وانت لو تقدر تعمل فرقة صغيرة فى المكنا اللى انت فيه ولو عندك امكانيات تجيب كام عازف وتعزفوا الاغانى الشرقية اللى على اصلها حاتكسروا الدنيا ... يعنى انت قلت انك بتكتب اللى فى مخك وبتجيب عازف اجنبى وبيعزفه بس بيبقى عزف ميتود مافيهوش روح يعنى مثلا عندك حسن شرارة هو فى الغربى انا اعترف انو احسن منى 100 مرة لكن فى الشرقى
لو فيه صولو بياتى انا اقوله بمعنى لو هو قاعد جنبى وفيه صولو غربى هو طبعا احسن منى لكن لو فيه صولو بياتى بالطبع انا اقوله احلى والفكرة ان العازف الشرقى المكقامات دى بتبقى فى دمه
حاكتب لك تانى بعد كده عبد الوهاب كان بيعمل ايه مع بتوع الاورج اول ما السيكاه ظهرت فى الاارج او على الاصح الاورج كان غربى واول ما ركبوا لو سيكاه
مع اطيب تحياتى