[أحمد الجوادي]

المشاركة الأصلية كتبت بواسطة عادل صموئيل

اخى العزيز
بالعكس يعنى احنا الاتنين كل ما كلامنا يطول بنقول ذكريات جميلة وخبرات وللعلم فيه مئات بيقروا اللى بنكتبو يستفيدوا منه هو مشكلة البيتستاكاتو الشرقى فى الشيللو والكونترباص انو موهبة اكتر منو دراسة يعنى عظمة وحسان كمال كانوا فلتة من فلتات الزمن وكانوا اصدقائى وحصل كتير لما كنا بنسافر للخارج ان كان فى غرفة الفندق فيها سريرين بينام فيه عازفين وكذا مرة كان شريكى فى الغرفى حسان كمال بالذات .. كنا بنقعد نتكلم وهو حكى لى ان فى العمهد لما اتعلم كان بيتعلم العزف بالقوس والبيتسكاتو التقليدى والغربى اصلا لكن الشرقى ده هو اللى اخترعه ونفس الموضوع لعظمة
والتميز الخطير لهذين الفلتتين واللى ما اتكرروش تانى ان المبدع طالما بيبدع تلاقى ابداعه بيختلف حسب كل لحن وحسب كل جملة يعنى انت لما تركز معاهم تلاقى حركة معينة تجنن بيقولها مثلا لما يكون الايقاع مقسوم والمقام بياتى ولما تركز معاه فى اغنية تانية نفس المقام ونفس الايقاع تلاقيه بيقول ابداع تانى ... العازف القليل تلاقيه بيكرر نفس الحركة فى المقامات او الايقاعات
فى سر من اخطر اسرار الحان عبد الوهاب والسنباطى ثم بعدهم بليغ لقط منهم انك على نفس الفرقة ونفس المقام ونفس الاايقاع ممكن تعمل خمسين جملة كل جملة لها نكهة مختلفة وده الاعجاز بتاعهم يعنى اى ملحن لو انا جبت لو 7 جمل بياتى وايقاعهم مقسوم او واحدة كبيرة والجمل فى الحان مختلفة ممكن نلزقهم ورا بعض ماتحسش امهم الحان مختلفة لأن النكهة واحدة ولكن العبقريات دول كانت النكهة المختلفة بتيجى من حركة بيعملها حسان كمال ما يعملهاش فى اللحن التانى ثم اختراعات عبد الوهاب يعنى يخلى كذا آلة يعملوا حاجة مع بعض او القانون يداعب شىء ورا الفرسة يعنى مش فى منطقة عزفه ولكن فى منطقة نشازه
بس انا بجد كل ما افكر فيك اقول يا بختك انك لسه بتشتغل او ربنا اكرمك وانطك بتلاقى مجال تشبع فيه هوايتك
يعنى احنا الكارثة عندنا ان الفن انحدر مرة واحدة ونوعية العازفين اللى مثلى بقوا موضة قديمة يعنى مالناش شغل
وكلمة شغل مش انى اروح اعزف اى حاجة ف اى حتة واقبض ولكن انى اعزف فى فرقة زى الماسية اللحن كلو بيعتمد على الكمنجات .. مش انا فقط يعنى الحفانوى لو كان موجود النهاردة كان برضو مالوش شغل لن حتى نوعية شغلنا محتاجة سميعة ولحن حلو النهاردة مفيش سمعية فيه ناس بتتنطط والجملة الجملة راحت لن بقى كلو تزريع مزعج بيضيع نكهة الجملة ولاتظهر الجملة الجميلة من الرديئة من اللى اتسمعت 500 مرة قبل كده
مع اطيب تحياتى

أخي العزيز الأستاذ عادل المحترم

كل عام وأنت بألف خير، عيد ميلاد مجيد.
أعاده الله عليك وعلى جميع مسيحيي حبيبتي مصر أم الدنيا وعلى جميع مسيحيي الشرق من أقباط إلى أرمن إلى باقي الطوائف الحبيبة، وأعاده الله على مصر أم الدنيا وعلى جميع العرب مسلمين ومسيحيين بالخير والسعادة والازدهار.
أدعو الله أن تستمر الأحوال المستقرة في مصر الغالية جدا على قلبي، وأن يمتد الاستقرار لباقي الدول العربية.

بالنسبة لعظمة وعازف الشيللو حسان كمال فهما فعلا شيئا مدهشا، بالمناسبة لم أكن أعرف اسم عازف الشيللو قبل أن تكتب لي انت اسمه، لكنني باستمرار حينما أشاهد حفلة من حفلات كوكب الشرق، أقوم بمراقبة الحوار الأكثر من الرائع بين عظمة وحسان، أكثر من مراقبتي للست وللفرقة، فهو فعلا شيء مثير للدهشة. أنا ما بعرفش الاتنين، لكن باعرف أولاد عظمة الاتنين عصمت وحسيب، رحمهما الله، عصمت كان عازف كونتراباص هايل وحسيب كان زميلي في الكونسيرفتوار.
لا أخفي عليك فأنا في أشد الشوق لأن أجلس في فرقة شرقية كبيرة فكل الفرق التي عملت بها منها إثنتين شكلناها أنا وصديقي فيها عدد من الآلات لكن فيها كمان واحد وشيللو وبعض الآلات المختلطة، الكمان هو أنا.
تعلم بأنك حينما تجلس إلى جوار عازف كمان وكما نقول واحد يسلي التاني واحد بيقول عربة وصاحبه بيقول عربة تانية، بتكون حاجة في منتهى الجمال، أنا مفتقد لكل ده. يعني بيكون الشغل مرتب جدا لكنه (خواجاتي)، صحيح اني باعزف باسلوب عربي أصيل وأحيانا تركي بحسب العمل، لكن غير لما بتقعد جنب عازف كمنجة.
والأدهى هو أنني مفتقد للجو الشرقي، مفتقد لأن أجلس في قهوة حقيقية زي ما كنت زمان لما كنت طالب في مصر، كنت أجلس على طول في قهوة العريش في وسط البلد، وكان على طول بيقعد نجيب محفوظ ويلتف حوله عدد كبير من محبي الأدب، وكان بيقعد على بعد متر أو مترين من المكان اللي بنقعد فيه أنا وأصحابي.
بس بيني وبينك فإن مصيبة الأغاني الهابطة قد وصلت لأوروبا، سأروي لك قصة حدثت معي قبل عدة سنوات حينما كنت في لندن.
مرة كنت شغال في حفلة وكان العازفين مختلطين ما بعرفش أغلبهم، عارف إيه اللي قالوا لي؟
قال لي أحدهم: العازف الشاطر هو اللي بيكون حافظ أغاني فلان وفلاني، يعني الأغاني لناس أصبحوا مطربين وهم لا يعرفون شيء عن الموسيقى، يعني الأغاني اللي لو طلعت في التلفزيون عندي أو عندك فأنا وأنت سنغير المحطة عشان ما بنقدرش نقاوم نسمع النشاز ده والأغاني السيئة للغاية دي، ده في نظرهم هو العازف الشاطر. تخيل؟؟؟
بس كان لي أصحاب موسيقيين في لندن أغلبهم مصريين، كان المرحوم عبود عبد العال صديق كنت أحبه جدا وهو كان يبادلني نفس الحب، كنا بندردش في التلفون عشان كان ساكن بعيد جدا عني. وكان لي أصدقاء تانيين زي الجمل الكردي واللي اسمه الحقيقي جميل عوض، وهو من عازفين الأكورديون القدامى، وهو ظهر في نفس الوقت الذي ظهر فيه فاروق سلامة، واختارته أم كلثوم عشان يشتغل معاها لكنه لم يشتغل عشان كوكب الشرق كانت بتعمل بروفات كتير وكان الدفع مش ولا بد، ويقوللي انه كان بيجيب اللي بتدفعه كوكب الشرق في يومين. عشان كده برز فاروق سلامة، ولا أظن أنك تعرفه عشان هو صحيح من عمرنا تقريبا يعني أكبر مني بحاجة بسيطة لكنه نزل السوق (كما كنا نسميها) بدري وهو صغير جدا، وبعد كده ترك مصر إلى لبنان وثم إلى سوريا وبعد ذلك اتجه إلى لندن وهو مستقر هناك إلى اليوم. وفيه لي كمان صديق تاني اسمه وائل أبو بكر، وهو عازف كمنجة كويس جدا، صباعه يشبه صباع الجرشة، وكان لي أصحاب كتير غيرهم.
كنت على طول باقضي الوقت مع صديقي الجمل الكردي (جميل عوض) ومرة كنا قاعدين في بيته وقام عزف لي لونجا من تأليفه، قلت له حاوزعهالك دلوقتي، فقمت على كومبيوتره وكان منزل فينالي اللي باشتغل أنا عليه، وقمت كتبتها بسرعة وقمت موزعها ومخلصها واحنا قاعدين عنده في الشقة. أهي دي اللونجة اللي قلتلك عليها، لكن حطيت الأصوات بعدين:
Longa El-Gamal El-Kurdi, Arrangement and Harmony by Ahmad Al-Jawadi - YouTube

الجمل كان بيقولي انه مرة حصلت خناقة بينه وبين عبود في أغنية على الله تعود لوديع الصافي، كان الجمل الكردي بيضيف إضافة مش مكتوبة في النوتة وده خلى عبود يعصب على الجمل، لكن لما وديع سمعها قال لعبود: خليها زي ما بيقولها، أهي الأغنية والسولو، السولو اللي حصلت الخناقة عليه ييجي بعد دخول وديع مباشرة، يعني بعد على الله تعود على الله، سولو صغير جدا:
‫ظˆط¯ظٹط¹ ط§ظ„طµط§ظپظٹ - ط¹ظ„ظ‰ ط§ظ„ظ„ظ‡ طھط¹ظˆط¯ (ظ†ط³ط®ط© طµط§ظپظٹط©)‬‎ - YouTube
بالمناسبة فسولوات أغاني فيلم فريد الأطرش على الأكورديون للفيلم اللي عمله في لبنان كلها من عزف الجمل الكردي، وكان شغال مع عبد المطلب زمان.

لما كنت في مصر، انت عارف لما كنت باروح تسجيلات كل مرة باقعد جنب عازف واتعرف عليه، ويكون كتير من العازفين أكبر مني ويعرفوا كتير عن أسرار المغنين والملحنين، وكانوا بيقولولي على طول على حاجات مش ممكن أعرفها إلا منهم.

بالمناسبة فإن عبود عبد العال هو من أصل مصري ومن طنطا، وهو قريب الجرشة، وحسب ما انا فاكر انه قال لي أن الجرشة هو ابن عم أبوه أو حاجة زي كدة.

إلى اللقاء مع دردشة أخرى

خالص تحياتي

أحمد الجوادي