[عبد الهـادي]

المشاركة الأصلية كتبت بواسطة عادل صموئيل

احبائى
دايما الملحن الكبير اللى عايز يوصل رسالة ما فى الاغنية او عايز يعمل عمل متكامل اهم شىء عنده ان تحضير اذن المستمع للى حا يتغنى كل ما تكون المقدمة الموسيقية قربية من طبيعة اللحن اللى حايتغنى كل ما تحضر المستمع لتذوق الغناء يعنى مثلا لو كلمات الاغنية مفرحة ممكن اعمل فى المقدمة فرح لكن لما تكون كلمات الاغنية حزينة يعنى واحد حبيبته تركته وعمال يبكى عليها ما اجيش انا اعمل فرح فى المقدمة لأنى بوجه مود المستمع اتجاه تانى ويسرح منى فى شىء ومش حيتعايش مع الغناء عندك مثلا اغنية ساكن قصادى وبحبه لنجاة وعبد الوهاب كلكم سمعتوها وعارفين القصة
لازم تكون المقدمة اولا رصينة حزينة شوية ومش مفرحة اوى بمعنى ان نجاة بتقول ساكن قصادى وبحبه وبتمنى اقابله ... هنا الموضوع قصة انت اول مرة تسمع مش عارف حايحصل ايه بعد كده لو تلاحظ المقدمة مش بتوصلك لإتجاه معين
وجه فى وسط الاغنية موسيقى الفرح بس لو تلاحظ كانت فرح حزين لأن اللى حايتدوز حبيبها وحايتجوز واحدة تانية
العملية عملية تذوق يعنى
لما نيجى للأخ العزيز بد الهادى
طول الجملة الموسيقية او الازمة او المقدمة دى بتخضع لعوامل اخرى مهمة وخطيرة غير الابداع الفنى
اولا لو انا عايز الحن اغنية لعبد الحليم واغنية لماهر العطار مثلا
اغنية ماهر العطار لازم تكون مقيدة بزمن يعنى لازم طولها ما يتعداش اربع دقائق ونصف ( طبعا انا بكلمك كخبير فى الفن وكل ما يتعلق بالفن ) ليه اربعة ونصف بالتحديد ؟ عشان مسموح لماهر العطار فى الاذاعة بخمس دقائق فقط والمذيع لما بيقدم الاغنية بيقول تستمعون سيداتى سادتى الى ماهر العطار فى اغنية كذا تألأيف فلان وتلحين فلان ولما تخلص الاغنية لازم يقول استمعنا او غنانا ماهر العطار ويكمل الكلام بحيث ان الاغنية بالتقديم والختام ده تاخد خمس دقائق الا ربع دقيقة لن الاذاعة محددة بزمن يعنى برنامج كذا الساعة السادسة والربع تظبط ساعتك عليه
اما عبد الحليمالوقت عنده اذاعيا مفتوح بمعنى ممكن يعمل اغنية زى اهواك خمس دقائق او عشردقائق او نصف ساعة او ساعة براحته بس اسضا خلى بالك لازم تكون انقص من الزمن بنصف دقيقة عشان زى ماقلت يعنى النصف ساعة لازم تتظبط فى المونتاج بحيث تبققى 29 دقيقة ونصف لأن الموضوع ده مهم ان الملحن يعرف تأليف مين وتلحين مين
فيه عامل خطير تانى لو انا حعمل 4 اغانى لفيلم مثلا هنا الأفلام نوعين اما فيلم لنجم كبير زى فريد الاطرش مثلا ممكن يبقى الغنا جزء كبير من الفيلم يعنى ممكن فى الآخر اعمل لحن طويل شوية لكن الاغانى لازم ماتتعداش وسط الفيلم خمس دقائق ... لو مطرب من الزبالة بتوع الايام دى ممكن الاغانى تكون اطول ويجيبوا كذا بنت ترقص وكل ماتكون البنات عرايا اكتر الفيلم بيسموه بتاع شباك .. من هنا طول المقدمة الموسيقية او الجمل الموسيقية بيحدده الحاجات دى ... يعنى رياض السنباطى مثلا فى كتير من الحانه بيعمل تقسيمة عود منفصلة عن الاغنية وغير محددة الطول وفى حالة لو فى الاذاعة وقت طويل بيذيعوا الاغنية بالتقسيمة وفى حالة وقت قصير بيذيعوا الاغنية بدون التقسيمة وتحت امرك فى اى سؤال مع اطيب تحياتى

شكرا جزيلا لك أستادي الغالي عادل صموئيل على توضيحك الجميلة
و أرجوا أنني لم أزعجك بأسئتي الكتيرة
مع تحياتي و خالص محبتي و تقديري