[عادل صموئيل]

الاخ العزيز عبد الهادى

كلمة لازمة فى الموسيقى الشرقية لها كذا معنى ... وهى الموسيقى المرتبطة بالغناء
يعنى امسك اى اغنية لأى مطرب كبير قبل مايفتح فمه ويغنى المدهب او اول جملة فى اى كوبليه بتجد جملة العازفين بيعديوها كتير يعنى ممكن اربع مرات او اكثر هى فى النوتة بتكون محددة بمرجع لكن احنا بنفضل نكرر فيها زى ما انا قلت لحد ما المطرب يشاورلنا انو حايبتدى الغناء دى اسمها لازمة الانتظار يعنى جملة موسيقية بتتكرر بعدد غير محدد لحد ما المطرب يبدأ فى الغناء ولازم تكون من مقام الجملة الغنائية اللى حايبدا منها المطرب غناؤه

اما كلمة لازمة مجردة وهى الردو التى بترد بيها الفرقة على المطرب اثناء غنائه يعنى مثلا اغنية فكرونى بتقول : كلمونى تانى عنك ( هنا لازمة صغيرة 3 حروف ) فكرونى وهكذا
وفيه لازمة الطول يعنى بتكونجملة كاملة فى حدود 8 موازير على الاقل دى تلاحظها جدا فى اغانى ام كلثوم لعبد الوهاب يعنى فى الكوبليه الاول مثلا له طريقتين اما انها تخلص الكوبليه كله بأنها تقول الجزء المكرر فى كل الكوبليهات زى مثلا انت عمرى
آخر كل كوبليه بتقول اللى شفته ...
لكن عبد الوهاب بيعمل لازمة بحيث ترجعك لأول الغناء يعنى تعيد الكوبليه منه فيه وثانى مرة تقفلو ب اللى شفته وتنهى الكوبليه وبيتميز عبد الوهاب بالذات انو مبدع فى هذه اللزمات
فيه احيانا الملحن بيخلى اللزمة اللى اثناء الغنا طويلة شوية يعنى بدل من تكون حرف او حرين او 3 او 4 حروف انو بيعملها مازورتين او 4 موازير ودى بتكون لو الكوبليه مجهد فى الغناء بحيث يخلى المطرب يستريح ثوانى يعنى
النهاردة انت اختار اى اغنية وشوف الكلام ده على الطبيعة يعنى الجملة اللى بتتكرر قبل غناء المذهب او الكوبليه لازمة الانتظار والحروف اللى بين الكلمات او العبارات اسمها لازمة
والجملة عشان تعيد الكوبليه منو فيه اسمها ايضا لازمة اللزمات الصغيرة لو تلاحظ النوت بتاعتى انا بضع فوقها خط لو قوسين على جنبيه لتحديد اللزمة وده مهم لأن العازف لما بيعزف غناء المطرب بيعزف بصوت منخفض حتى لا يطغى على صوت المطرب وعند الازمة العازف بيعزف بقوة حتى تظهر الازمة لذلك مهم جدا تحديدها بعلامة
واحيانا يكون المغنى يغنى من القرار والملحن عايز اللازمة من الجواب وهكذا
مع اطيب تحياتى وتحت امرك فى اى اسئلة