[عادل صموئيل]

احبائى
اقدم لكم اغنية مدحت صالح

كوكب تانى

الاخ العزيز اللى طلبها قال انو محتاجها لحفلة وعايزها قبل يوم 20/ 11

انا طبعا لما حد بيطلب نوتة ومش مستعجل يعنى حين ميسرة حاجة ولما حد بيطلب النوتة ومستعجل عليها لحفلة ما او حاجة زى كده بفكر بطريقة لما تكون عايز تشترى حاجة كمالية ممكن تنتظر شوية لكن المستعجل بتعامل معاه زى اللى عايز يشترى دواء من صيدلية يعنى لازم حالا نعملها
انا شخصيا مش بحب مدحت صالح لسبب كنت بحبه اول مابدأ بعدين ابتدا يجود اوى اوى ويتفزلك بيطير الالحان من مخى وبالذات قرفت منه لما ابتدا يغنى اغانى عبد الحليم او حد من العمالقة .. لأن الاغنية لو فيها فزلكة كان عبد الحليم اتفزلك .. عبد الحليم ومن معه خرج بعده اجيال من المطربين لنهم بغناهم السهل كان من السهل ان اللى بعده يتعلم منه لكن اللى بيغنى غنا معقد وفيه تجويد اكتر من الازم بيخرج بعده جيل فاشل اولا لأنه مش حايقدر يقلده حرفيا بيعمل حاجة شبهه وعادة بيغلط كتير ..ومن هنا احب اشدد على ان اللى ينفذ اللحن ده وبالذات على تلاميذ اوطلبة يحاول بقدر الامكان يخليهم يغنوا اللحن الاساسى وانا هنا بقدر الامكان كاتبه سهل .. لأن مدحت صالح كدارس موسيقى ومطرب متمكن ممكن يتفزلك بس عارف حايقفل الفزلوكة فين لكن الطالب اللى مايعرفش موسيقى لو قلده حايخرج بره الوحدة .. بمعنى فاكرين ام كلثوم لما يكون فيه نغمة طويلة روند مثلا وكانت متسلطنة ومشعشعة
وحبت تطول فيها بتعمل تطويل محسوب يعنى لما تطول الروند مرة بتطول روند او عايزة تطول اوى بتعمل كذا روند يعنى عارفة حاتخلص التطويلة دى فين على الدوم .. لو مطربة فاشلة طولت تروح مطولة اى حاجة مش محسوبة واكيد بتقع فى الوحدة وتبقى فضيحة
فيه حاجة مهمة هنا ... مدحت صالح مغنيها من دو وبيوصل لنغمة فا فوق المدرج .. التلاميذ ما اعتقدش ممكن يوصلوا لها .. انا عشان الامانة وانى اقدم تدوين يخليك تعرف تشتغل منزلها مرتين مرة من دو مرة من صول
واللى حايستعملها يشوف الاصلح للمجموعة اللى حايشتغل معاها
مع اطيب تحياتى واتمنى ان الاخ العزيز اللى طلبها يدخل المنتدى بسرعة وياخدها فى وقت مناسب عشان يشتغل فيها طبعا انا برضو واخد بالى م الفروق الفردية يعنى ممكن واحد يطلعها فى نص ساعة وواحد تاخد معاه وقت شوية عشان كده انا فضيت نفسى وعملتها بأقصى سرعة