[عادل صموئيل]

الاخ العزيز

طبعا انا ما اقدرش اتكلم بعد اخى العزيز المايسترو محمد الآلاتى
واولا بعد اطيب التحيات بعيد الاضحى المبارك

كلمة دوزان غربى ودوزان شرقى وفيه كمان دوزان تركى

بس ده بيكون فى الكمنجة فقط لأن الكمنجة آلة غربية الاصل ودوزانها الغربى صول رى لا مى
ولكن العرب اخترعوا لها الدوزان العربى او الشرقى يعنى خلوها تتكلم عربى وصار الدوزان الشرقى صول رى صول رى
وهذا الدوزان بيعطيك ميزة اولا ان الكمنجة بتكون الاوتار الحادة حنينة ناعمة لأنها بتنزل درجة
واخطر ميزة فى الدوزان الشرقى للكمنجة ان بيبقى عندك نغمة صول الوسطى ( اللى ع الخط الثانى فى المدرج ) بتبقى متكررة مرتين ورا بعض مرة عفق ومرة وتر مطلق والتميز ده بيعطى العازف الشرقى البارع ميزة مهمة جدا انو امتى يستعمل النغمة المعفوقة او الوتر المطلق بمعنى فيه حلية بيعملها محتاجة يسحب صباعه من الفا الى الصول ودى ماتتوفرش على الوتر المطلق
اما الدوزان التركى بيبقى صول رى صو دو وهو هنا اعطى الوتر الحاد نعومة انو بينزل درجتين زائد تكرار الحركة اللى قلت عليها مع نغمة الصول انو بيبقى عندو نغمة دو معفوقة ونغمة دو وتر مطلق ويعيش حياته
الامكانيات دى مش متوفرة فى الكمنجة لما تكون مضبوطة غربى وللعلم العازف القدير احمد الحفناوى كان عزفه ونكهته متميزة لأنه كان بيظبط دوزان كمنجته تركى
اما العود فهو آلة شرقية الاصل يعنى اللى اخترعه وفضل يتطور حتى وصل للعود اللى بنستعمله دلوقتى ( وخلى بالك ان كل الآلات الموسيقية مكانتش كده اول ما اخترعوها يعنى فضلت سنين وممكن قرون تتطور حسب حاجة العازفين لحد ماوصلت الى ماهى عليه الآن
ونرجع للعود زى ماقلت آخر تطور فيه كان الدوزان الحالى اللى كل العرب بلا استثناء بيستعملوه
طيب ... انا كمدرس موسيقى ( مش عادى يعنى شاطر شوية وبفكر فى اى كلام بسمعه وكضابط مباحث موسيقية من منازلهم ) يعنى قلت الاخ العزيز فارس ممكن يكون جاب الكلمة دى او سمعها فين
فيه عندنا فى الموسيقى حاجة اسمها نضبط الآلة طبقة صغيرة ودى كانت تتميز بها فرقة السيدة ام كلثوم وده بالذات اهم سر من اسرار السلطنة فى موسيقى ام كلثوم
يعنى انت فى اى فرقة العازفين بيعملوا الدوزان ازاى ؟؟؟ بناخد نغمة صول من آلة ثابتة زى الاكورديون يعنى انا فى كمنجتى باخد نغمة صول من الاكورديون واضبط عليها كمنجتى ولازم كلنا ناخد الدوزان واحد واحد من الاكورديون عشان يبقى دوزان الفرقة واحد
فى الطبقة الصغيرة بناخد نغمة فا ونضبط عليها الكمنجة ونفس القصة مع العود يعنى بدل ما بياخد نغمة صول ويضبط عليها العود بياخد نغمة فا ويظبط على العود عادى زى مابيضبط
اعتقد ان ده مصدر الكلمة اللى انت سمعتها وعملت عندك التساؤل ده لأن العود ماولش غير دوزان واحد
بس ممكن يختلف انو بيبقى انقص تون يعنى بدل الصول تبقى فا وتضبط باقى الاوتار على بعض
انا آسف للإطالة بس حبيت اشرح الموضوع بحذافيره عشاننعرف اختلاف الدوزان دى معناها ايه
ولوحضرتك عندك اى تساؤل آخر او حتى فى الكلام اللى انا قلته انا طبعا تحت امرك
ولععلم اقول لك معلومة خطيرة جدا فى الحياة ( ومش فى الموسيقى فقط دى فى كل حاجة ) ممكن استاذ كبير فى شىء وييجى تلميذ صغير يسأله سؤال تكون السبب فى ان الاستاذ ده يفكر فى شىء مكانش شايفه من قبل وتكون مصدر اختراع ...
مع اطيب تحياتى عادل صموئيل