[Samers]

مساء الخير استاذنا العزيز عادل
اود اولا ان اثني على هذا الجهد الجبار في جمع ماسات الفن الشرقي وهي مهمه ليست بالسهله واتمنى لكم دوام الصحه والعطاء
لدي استفسار فيما يخص مؤلفات الاستاذ الموسيقار رياض السنباطي ، يا ترى هل هناك من قام بتدوين بعض من تقاسيمه العظيمه
ودمتم بكل الحب والموده

الاخ العزيز
انت لو راجعت كل مرة انا حد سأأنى نفس السؤال وانا جاوبت كذا مرة لكن نقول كمان
الموسيقى نوعين نوع على ميزان وده سهل تدوينه حتى لو اللحن صعب ممكن مدون شاطر كافيش حاجة تستعصى عليه بتبقى خلصت المشكلة يعنى اللحن لو كان صعب اللى بيعزفو بيتعب شوية لكن بيطلع بحذافيره لأن اللحن اللى على ميزان بيكون فى حدود كل العلامات الايقاعية المعروفة بانواعها وانت بتعزفو وبيطلع مضبوط 100%
لما نتكلم عن اللحن اللى من غير ميزان وهو نوعين اما ادليب او تقاسيم
والادليب يعنى مثلا زى اغنية انت عمرى
بتقول : رجعونى عينيك لأيامى اللى راحوا لحد نهاية الادليب ويدخل الميزان او اللحن اللى لى ميزان من : قبل ماتشوفك عينيا .. الى آخره
الادليب ده بيختلف عن الموزون ان المطرب بيطول فى علامات ايقاعية او بيقصر فى علامات اخرى والحركة دى ممكن تخرج عن المقاس المحدد بتاع العلامة اللى كلنا عارفينه وبنمارسه بمعنى ان النوار مش بتبقى نوار ممكن تبقى اطول شوية او اقصر حاجة كما ان الاديب بيحتوى على سكتات كتير ايض مش محددة الطول بدقة ..
والخلاصة ان الادليب لما بنكتبه بيبقى تقريبى وعشان تعزفو صح لازم انت تكون حافظ الاغنية بحيث ان تطوع النغمات الموجودة حسب ما انت حافظه وحسب ما ام كلثوم بتقول يعنى انا لو بعزف وقدامى مطرب .. فى الادليب انا بقرأ النوتة لكن اذنى مع المطرب بنسبة 90% عشان ما ابقوش او اتأخر عنو وهنا بالطبع ممكن الخبطه فى غناه
اتمنى تكون وضحت الصورة وعلى فكرة انا كل ما حد يسألنى نفس السؤال ممكن اقول معلومات اكتر
الادليب بيبقى الملحن هو اللى ملحنه بمعنى انك كل ما المطرب يغنى نفس اللحن ( يعنى لو ام كلثوم غنت انت عمرى خمسين حفلة مختلفة ) لازم تلتزم بنفس اللحن يعنى نفس الادليب ممكن تجود فى جزء صغير جدا لكن الهيكل لازم يكون موجود لأن اللى بيسمعها حافظه وبيستمتع بالتكرار ده
اما التقاسيم ده موضوع تانى خالص ... يعنى فيه عازف عادى بيعزف اللحن لكن مايعرفش يعمل تقاسيم لن التقاسيم بتبقى ارتجال ( يعنى نوع من التلحين لكن فورى ) لازم يكون العازف اولا قدير جدا جدا فى الآلة بتاعته وثانيا يكون خبير فى المقامات والانتقالات السليمة بينها وثالثا عندو ابتكار فى حلاوة الابتكار ده
والتقسيمة مش بتتحفظ بمعنى ان السنباطى نفسه شخصيا ( واشتغلت معه 20 سنة ) لو فى اغنية محددة زى اشواق مثلا بيقول تقسيمة .. لو فى حفلة اخرى بيقول تقسيمة غيرها نفس القصة فريد الاطرش كان بيقسم فى معظم حفلاته
ولو سمعت كذا تسجيل لأغنية الربيع مثلا تلاقى التقاسيم مختلفة كل حفلة بمعنى ان بيبتدى بمقام الاغنية ثم ينتقل منه الى مايجود بيه ربنا عليه فى تلك اللحظة الفورية
والجمهور كمان لو دور خطير فى الموضوع يعنى لو عمل نقلة حلوة والجمهور قال الله يعنى اظهر اعجابه اوى تلاقى المزاج يبقى احلى والتقسيمة تطلع خرافية
وانا كمدون ما اقدرش ادون تقسيمة لن زى ماقلت من قبل ان الادليب بيبقى العلامات مش فى مقاساتها الطبيعية
وحتى لو اتكتبت اولا حاتبقى صعبة جدا وثانيا حيروح طعمها وتبقى سخيفة
طيب انا عايز اعزف اغنية الربيع فى حفلة الجمهور سميع يعنى ممكن اعزف تقسيمة .. انا بسمع تقسيمة فريد وآخد الروح بتاعتها واعزف التقسيمة ببصمتى انا
من هنا الدرس اللى تستفيده لا تبحث عن نوت التقاسيم فهى غير مجزية خالص ... لو توافرت فيك الشروط اللى قلت عليها فوق يعنى تسمع التقسيمة .. وتكون متفهم فى المقامات يعنى تحس ان التقسيمة بدأت بياتى مثلا بعدين ممكن تخرج منو على كرد يعنى تعمل مى بيمول وتقول جملتين تركز الكرد ( للمستمع ) بعدين ممكن تعمل فا دييز يبقى حجاز
او من البياتى تتحرك ناحية الهزام يعنى مئات من الانتقالات ولازم طبعا تكون سلسة عشان المستمع يحس بيها
على فكرة نفس القصة لو بتسمع قرآن كريم للقراء العظام بتوع زمان زى الشيخ مصطفى اسماعيل ومن كان فى عصره كانوا خبراء فى المقامات يعنى نفس السورة لو ابتداها بياتى وقالها فى كذا مكان فى نفس الليلة كان كل مرة بيقول اداء ومقامات مختلفة
واقول لكم على سر خطير ( طالما جبنا سيرة الشيخ مصطفى اسماعيل بالذات ) كان عبد الوهاب وام كلثوم شغوفين جدا جدا يسمعوه .... وانا اقول لكم على السر .. كانوا لما بيسمعوه ممكن يسرقوا منه نقلة لحنية يعنى من مقامين بعاد عن بعض ماحدش لصقهم مع بعض من قبل ... يعنى تخيل الجهلاء بتوع دلوقتى اللى بيقول لك الموسيقى حرام مع ان الشعائر الدينية فى كل الاديان فيها كمية رهيبة من الموسيقى يعنى حتى لما تسمع الآذان ده فيه موسيقى
وتخيل سيادتك لما كانت ام كلثوم وعبد الوهاب انهم كانوا بيتعلموا من موهبة الشيخ مصطفى اسماعيل نقلات مقامية خطيرة جدا جدا ما وصلتش لأن تدرس فى المعاهد الموسيقية
مع اطيب تحياتى عادل صموئيل