[انغام الشرق]

[SIZE="4"]

استاذنا الفاضل و الفنان الكبير
الاستاذ \ عادل صموئيل
اولا مافيش كلمات شكر تقدر توفيك حقك يا استاذ على مجهوداتك الكبيرة معانا
و كرم حضرتك فى العطاء الغير محدود بيطمعى اكتر علشان اتعلم من حضرتك اكتر و اكتر
انا ليا رجاء من حضرتك .. انا عندى فى المدرسة اكورديون و جيتار و ماندولين و كمان و نفسى اعمل توزيع للآلات بس مش عارفة اعمله ! فياريت حضرتك تشرحه لى بأسلوبك السهل اعمل التوزيع على الالات ازاى ؟
و لك منى كل الشكر و التقدير

[/SIZE]

الاخ العزيزة اشكرك للثقة الغالية دى
الموضوع بيتلخص من خبرتى الطويلة فى شغل المدارس بس معلش اسمحى لى شرح لك الموضوع بالتفصيل المفيد ليكى
الملحوظ ان اكتر آلة بيبقوا التلاميذ فيها شاطرين اولا الاكورديون وثانيا المندولين واقلها الكمان إلا اذا وجد واحد موهوب شوية لأن مشكلة الكمان الصوابع مش بتبقى مضبوطة عادة يعنى بتطلع النغمات اما خاسة او زايدة
او مثلا تسمعى تلاقىمفيش فرق بين المى بيمول والمى ناتورال لأن التلميذ بيحط صباعة فى المنطقة وخلاص
لذلم بنهرب من الموضوع ده اننا بنخلى معظم الشغل بتاع الكمان اوتار مطلقة يعنى النغمات بتبقى اقل شوية
بعكس المندولين لأن التلميذ بيحط اصابعه فى خانات محددة فبيطلع اللحن مضبوط شوية
المشكلة دى عمليا وعلميا بتحصل ليه فى الكمان ؟؟؟؟ لأن الطالب فى العهد او الكية الموسيقية بيدرس صولفيج وغنائى بالذات ده بيخليه بيغنى اللحن اللى قدامه بعينه يعنى بيبقى فاهم وحاسس الفرق بين المى بيمول والمى ناتوريل لكن التلميذ عندكم فى المدارس مش بيدرس صولفيج وانما المدرسين عودوه انهم عايزين منو يطلع المسابقة وخلاص وبيخلوه يحط صوابعه ( او باااالتحديد هم بيحطوا له صوابعه فى المكان اللى هو اصلا مش متفهم ايه الموضوع لذلك هو نفسه مش بيحس انو نشاز كده او بيقول نغمة غلط )
اما الجيتار فى المعمة دى مش بيقول لحن اساسى او صولو ولكن بيقول اكورات ومن هنا لازم الاكورات تكون اولا سهلة يعنى الاكور تحت ايده بمعة التلات نغمات اللى حايقولهم يكونوا فى مستوى طبيعة ايدو مش تكون نغمة منهم بعيدة وتكون حتاجة مثلا يفتح صياعو اوى يوصل لها ولما ينتقل من اكور لأكور برضو تكون النغمات اللى حايوحها فى الكور التانى اما يكون منهم اتنين مشتركين ويحط عليهم واحدة ثالتة تكون قريبة ... والمهم الاكورات ماتبقاش كتير عشان يقدر يحفظهم وطبعا بنستعمل الانقلابات بتاعة التآلف يعنى مثلا دو مى صول ممكن تخليها مى صول دو
او صول دو مى حسب النغمات اللى تحت الايد زى ماقلت
اول حاجة المفضل انك بتعملى مدرجات مع بعض وتكتبى الاول اللجن الاساسى بقدر الامكان كله للأكورديون
عشان صوته مضبوط والعيال بيبقوا اشطر زى ماقلت يعنى اللحن حايبقى مسموع كويس
اما التوزيع الصح او المذوق هو اللى بيبقى زى رشة الملح ع الاكل يعنى مش كتير اوى يضيع اللحن الاساسى ومش قليل اوى اوى يبقى كأن مفيش توزيع
التوزيع عامل زى واحدة بتلبس فستان والتوزيع هو الاكسسوار الخفيف اللى بتحطه على الفستان
بالطبع لو تستعملى برنامج انكور حايفيدك اكتر 1000 مرة من الكتابة بالقلم يعنى فى اعداد الصفحة تعملى شوفى عايزة كام صوت مع بعض وزى ماقلت تكتبى لاول اللحن الاساسى للأكورديون وتكتبى الباقى من عندك للآلات التانية ... التميز الخطير طبعا لبرنامج انكور ( وانا منزلو هنا مع الشرح ) انك بعد ما تكتبى اللحن الاساسى تسمعيه كويس لو فيه حاجة ... وبعدين وانتى بتكتبى التوزيع تسمعى اللى بتكتبيه يعنى تحسى حلو كده ولو مش حلو تغيرى واهم شىء تحسى لو الطبخة حاتشيط
فى الختام عايزك ترجعى لأى مشاركة للأخ العزيز هيثم الصالحى هو عامل فهرس مهم لكل اعمالى منهم نوتات انا موزعها للمدارس وان شاء الله تعجبك وكمان عشان يبقى عندك مستوى لو انتى عايزة تعملى حاجة يبقى تعملى حاجة زى كده
وعلى فكرة خلى بالك انتى لو شفتى نوتات الكورديون بتاعة المبتدئين بصى على الإيد الشمال حتلاقى كام كورد محدد مش اكتر من 3 وبيتكرروا
والخلاصة احنا بنعمل شغل مدارس مش شغل اوبرا يعنى اقل توزيع ممكن ويبقى حلو احلى من الفزلكة وماحدش حايفهم حاجة لا من المستمعين فى حفلة ولا حتى بتوع اللجنة يعنى لو واحد اتفزلك هم مش حايستوعبوا اللى هو عامله وممكن يدوا له درجة اقل واقول لك حاجة تضحك من كام سنة كان عندنا مستشارة واصلة بالتدرج الوظيفى يعنى معلوماتها الموسيقية زى مستشارة التدبير المنزلى
انا فى المقطوعة عملت فزلوكة صغيرة هى طبعا مش فاهمة اللى سامعاه اصلا وعايزة تتلكك لى على غلطة لأن كان معاها الاستاذ الكبير لورنس الموجه العام وقتها لأنه قال قبل ما اقدر الفريق والآن نستمع الاى احد روائع الموسيقار الكبير و... ( قعد يمدحنى شوية ) هى تقريبا غارت لأنها عايزة تحس انها اهم واحدة فى الناس الموجودة المهم بصت فى النوتة لقت فى صوت لاكورديون صول وتحت فى آلة صول دييز حاجة كده يعنى تانية صغيرة قالت لى انت عامل حاجة غلط قلت لها ده دومننت سفن يا ابلة
0 هى طبعا ماتعرفش الكلام ده الدومننت سفن هو تألف الخمسة بسابعتها يعنى دو مى صول سى بيمول وبتكون السابعة صغيرة وبيسموه كمان تآلف السابعة المتسلطة
ولو الحاجة كانت بتسمع فيروز 90 % من اغانى فيروز او سبب السحر فى توزيع الرحبانية هو السابعة المتسلطة دى اللى بتعمل نغمتين متنافرتين بس بحرفية تخلى المستمع يتجنن ويتهبل وللعلم دى التميز بتاعهم واللى ماحدش من الموزعين ببيعرفيلعب فيه يعنى الملعب بتاعه المهم ربنا يسامحها
انا آسف للإطالة واتمنى تكونى استفدتى حاجة من الكلام اللى انا قلته وتحت امرك
مع اطيب تحياتى عادل صموئيل