[زهرة مصر]

المشاركة الأصلية كتبت بواسطة سعدالشرقاوى

خايف
شعر/سعدالشرقاوى
نفسى اتلايم يوم على باكو
وأهدى شويّه ياناس م الدوخه
وألمح نفسى داخل على بيتى
وبين دراعاتى شايل بطيخة
واشخط مرّه واقول لمراتى
هاتى سكـّينه بسرعه ياشيخه
أصل أنا داخلي خلاص إتحسّن
وأقدر اجيبلك بـٌكره فسيخه
,,,,
وأشترى كوتش قديم لحماده
وأحلى تشيرت لأخته كمان
وأقدر أسدّد نص ديونى
وأعمل صٌلح مع الدكان
واشحن كارت بعشرة جنيه
وأبقى متاح من أيْ مكان
وآخد ابنى ف وسط السوق
ابنى خلاص ما بقاش عريان
,,,,
وأدفع قسط لكل فاتورة
وأفك الحصر عن العدّاد
وأعمل طعن ف كل شيكاتى
يمكن أعيش مبسوط ياولاد
وأشرب شاى الراكية وأغنىّ
وأرقص على نغم البرّاد
وارفض رهن دولابى ونيشي
وابدأ أجهّز بنتى سعاد
,,,,
خايف أنظــّم كل حياتى
وأنسى همومى وأعدّل حالى
اجيب غساله كمان لمراتى
وأكوى هدومى وأزهّر شالى
وأعمل غدْوه يا ناس لحماتى
واجمّد قلبى وأعزم خالى
ألاقى مراتى بتعدل راسى
وتحْرمنى أكمّل مناماتى

احترت اختار اي جزأ للرد

جميله جدا