[dorame]

المشاركة الأصلية كتبت بواسطة dorame

اخى العزيز
كلامك بيسعدنى لأنك متفهم ما اقول
اخطر مشكلة اليوم مش فى المطربين ولكن فى ذوق المستمعين الذى انحط لدرجة عالية جدا
يعنى مثلا فى الطعام لو فيه محلين واحد بيقدم اكل نظيف ومتقن وجميل وبجواره محل بيقدم اكل ردىء وفاسد تلاقى الجمهور بيقبل على الردىء ... او مش بيميز الفرق بينهم والشىء ده خلا الكل بيقدم طعام ردىء .. يعنى حتى لما تنزل اى دولة عربية وتجرب الاكل القومى بتاعها تلاقيه مش حلو زى زمان
نفس المشكلة فى الغناء يعنى بإستثناء القلة الباقية من زمان زى هانى شاكر ... الكل لازم تولع فيه لأنه بيفتقد اى الف باء الغناء وهو الاذن الموسيقية ال 100% , يعنى عبد الوهاب مرة قال كلمة : لو اتفق حماران لأطربا
يعنى اسوأ صوت هو صوت الحمار لكن لو حماران نهقا من نفس التون لأطربا
واللى بغنوا دلوقتى ماحصلوش الحمير
انت قلت عن الطبقة الصوتية لأم كلثوم .. مهما قدمت كان عندنا اكتر يعنى زى سيارة سرعتها 250 كم/ساعة
وبتجرى بسرعة 120كم /ساعة كده بتكون فى كامل طاقتها ولسه فيه اكتر كتير
من امثلة الاغانى التى كانت لم كلثوم ولكن القدر لم يسعف السنباطى اغنية يا حبيبى لاتقل ضاع حبى من يدى
واغنية بردة البوصيرى : كيف ترقى رقيك الانبياء ياسماء ماطولتها سماء
وانا شخصيا عزفت مع ياسمين الخيام هذه الاغنية وجت فى مقطع فيه تطويل مسافة روند وياسمين نسيت نفسها وحبت تعمل زى ام كلثوم وطولت اكتر وخرجت خارج الوحدة لن ام كلثوم كانت لما بتطول وبتمد لحد الدوم مش تطول وخلاص بمعنى لو نغمة روند وتقفل على الدوم لازم لما تطول قول كمان روند او اتنين ولكن لازم تقفل على الدوم .. ام كلثوم كانت بتحسبها وكان عازف الرق يعنى بتنظر اليه بطرف عينها ( ودى اهم حاجة ) وبيقفولوها مع بعض ... وكان زمان عندها عازف رائع اسمو ابراهيم عفيفى كان حتى لو طولت وكانت حاتقع كان العبقرى ابراهيم عفيفى بيعمل اتنين دوم كان بيعدل الايقاع لكن ياسمين الخيام ماتعرفش الكلام ده ولما وقعت طبعا السنباطى اتجنن
بعدها بشهركنا فى بروفة وقال لى بكره عندكم ايه بالليل قلت له عندنا حفلة لياسمين الخيام قال لى والله العظيم : هى لسه بتغنى ؟؟؟؟؟ يعنى ياسمين الخيام دى على الاقل بتغنى احسن من اليسا وكل الطابور ده لكن السنباطى لم يكون يعترف بيها كمطربة لأن المقاييس عنده كانت صعبة جدا ... واذا كانت عجبتك كلمة الصراصير
احنا كنا فى مناخ الملحنين كلهم دمهم خفيف يعنى بيطلع منهم حاجات تجنن وعفوية واكيد اللى اتربى فى هذا المناخ اكيد يطتعلم منهم
اقول لكن حاجة تضحك : مرة كنا فى بروفة لأغنية دينية لسعاد محمد وكان فيه صولو السنباطى قال نعمله اكورديون ... ساعتها كان عمر ما اى ملحن عمل صولو اكورديون فى اغنية دينية فى التاريخ
فقال عازف متخلف الاكورديون حرام يا استاذ .. فرد عليه السنباطى بعفوية : ليه يا ابنى هو بيعزف مورتاديلا ؟؟
والمعروف ان المورتاديلا لحم محفوظ مصنوع من لحم الخنزير
ونكمل بعدين مع اطيب تحياتى عادل صموئيل

استاذنا العزيز الغالي والمتواضع عادل صموئيل
اني سعيد جدا بالنقاش معاك وبامثالك الرائعة الناقدة وتحليلك الموسيقي والصوتي الذي في محلة
بالنسبة لاغنية لا تقولي ضاع حبي من يدي
كان عندي احساس كبير انها لام كلثوم وهذة معلومة لسه طازه انها كانت لام كلثوم لاننا اشوفها مفصله على ام كلثوم اوقول بيني وبين نفسي كيف لوغنتها ام كلثوم واخيرا ثبت انت احساسي وياريت لو تنوتها يا ريت
بالنسبة بردة البويصيري اول مرة اسمع عنها وسابحث عنها وحلو انك فتحت موضوع ياسمين الخيام
هذة الفنانة صوتها عذب وشجي جدا مع انها غنت اغنية وحدة جدا " ابعد عني عيونك " من اروع ما سمعت الحان عبدالوهاب وبعدها كلها موشحات دينية ولم ينصفها احد اعلاميا
بالنسبة لسوال من اكثر الملحنيين استغل قدرات ام كلثوم الصوتية مع اننا متفقين ان قدراتها كبيرة وما حد يوصلها لكن من الاكثر برايك

واول مره اعرف ان السنباطي كان دمه خفيف مع ان النكتة جدا حلوة بتاع لحم الخنزيز ده حلوه حلوه حلوة
تحياتي واحترامي