[عادل صموئيل]

المشاركة الأصلية كتبت بواسطة sfakhri

الأستاذ عادل بعد التحية والتقدير لشخصك الكريم أود الاستفسار عن أمرين

1- برأيك الشخصي ما هو أفضل لحن عربي (موسيقى أو أغنية ) من ناحية الإبداع في التأليف وليس من حيث الشعبية .

2 - ما حقيقة أن الموسيقار محمد عبد الوهاب قد نَسب إليه ألحانا غربية وعربية ولم تكن من تأليفه ، و متى نقول أن هنالك "سرقة " للحن ما .

مثال : أغنية عندك بحرية للفنان وديع الصافي الذي سمعته بإحدى المقابلات و هو يقول أن اللحن لم يكن لمحمد عبد الوهاب بل هو لحن تراثي لبناني ؟

بالإضافة لما نقرأه عن اتهامات الموسيقار بليغ حمدي لعبد الوهاب بذات الشيْ. ولك جزيل الشكر

اخى العزيز
اسئلتك عويصة جدا جدا , ولكن احواول الاجابة عنها بقدر الامكان
انا لما قرأت مشاركتك لم ارد مباشرة ولكن فكرت شوية حقول ايه
اولا بالنسبة لسؤال ما هو افضل لحن عربى مش ممكن نقدر نقول ما هو افضل لحن ولكن اقل انصاف انك تقول ما هم افضل 100 لحن عربى على الاقل لسبب مهم
ايام الفن الجميل كان فيه ملحنين عمالقة ( مش عملاق واحد والباقى اقزام ) ومعنى عملاق ان جميع الحانة تقييمها يبدا من 90% وانت طالع .. وكل عملاق كان لابد ان يحافظ على قيمته انه مش ممكن يعمل لحن اى كلام يعنى كل لحن له نكهة وطعم وفكرة مختلفة .. يعنى انت لو اخترت ملحن واحد زى عبد الوهاب مثلا وعملت تدقيق فى الحانة خلال 40 سنة حتلاقى كلهم احلى من بعض .. بدليل ان فيه الحان اليوم عمرها اكتر من 60 سنة ومازالت لها عشاق ونفس الكلام ينطبق على جميع العمالقة ... والشىء الجميل فى ذلك العصر ان اى ملحن جديد عشان يدخل مجال العمالقة لازم يكون فيه مواصفات خاصة بدليل ظهور اجياال جديدة من الملحنين بعد عبد الوهاب والسنباطى وزكريا امثال كمال الطويل وبليغ حمدى والموجى وباقى العمالقة
فيه كمان ملحوظة خطيرة ان كل ملحن له عشاق ,, يعنى فيه ناس بتحب الملحن الفلانى اكتر وهكذا ... اما عن نفسى انا ظروف عملى تحتم عليا انى احبهم كلهم لسبب انى مش مستمع فقط ولكن كنت اما بعزف معاهم او بعزف الحانهم .. يعنى زمان ايام الاغانى الكبيرة كنا مع عبد الوهاب والسنباطى اللحن بياخد شهرين شغل .. يعنى شهرين لازم اكون وهابى او سنباطى
ثم يأتى بليغ كانت اغنياته تاخد عشر ايام لازم يكون مخى بليغى وهكذا
اما عن سرقة الالحان امتى اللحن او الجملة الموسيقية تعتبر مسروقة ؟
انت لما تشوف اى نوتة ممكن تلاقى مازورتين نوارات دو رى مى فا صول لا بيمول مثلا
حتلاقى الحركة دى متكررة فى خمسين لحن مختلف لكن مش سرقة يعنى ده سلم جايز وروده فى اى لحن .. لكن لما يكون مازورة فيها تفعيلة خاصة انت اول مرة تشوفها وواحد اخدها كما هى هنا ممكن تبقى سرقة والسرقة مشكلتها انها مش بتكون سرقة مع سبق الاصرار .. يعنى الملحن قصد يسرقها ولكن الملحن اذنه مثل جهاز التسجيل .. يعنى ممكن وهو نازل من سيارته داخل العمارة يكون البواب مشغل الراديو واذنه تلقط جملة هو مايعرفش بتاعة مين واثناء ما بيلحن الجملة دى تطلع معاه وللعلم حصلت كتير واثناء البروفات كنا بننبههم وكانوا بيغيروها
وفيه شىء خطير انتم ماتعرفهوش .. اى ملحن وهو مبتدىء بيسمع اللى سبقوه واللى بيتذلع فى الراديو لكن لما بيوصل لمرحلة معينة مش بيسمع الزملاء .. يعنى انت شخصيا ممكن تعرف اغانى كتير حديثة لعبد الوهاب السنباطى عمره ما سمعهم وهكذا ..لأن كل ملحن لما بيكبر لمرحلة معينه بيتقوقع حول نفسه عشان تفضل الحانه لها نكهة متميزة ... لأنه لو فتح نفسه مع الجميع لن تج النكهة الخاصة لكل ملحن وحايبقوا كلهم شبه بعض .. واقول لك قصة صغيرة لو انت بتفهم فى السيارات زمان قبل السبعينات كانت شركات السيارات العملاقة زى مارسيدس مثلا .. بتنتج سيارات لها شمل مميز تعرفها من غير ماتشوف الماركة اللى ليها .. يعنى حتى لو اتغير الشكل لكن فيه حاجات لازم تفضل زى ما هى زى الشبكة الأمامية او الفوانيس الخلفية لازم تكون نفس الستايل .. وكان اللى معاه فلوس يقدر يشترى السيارات دى بيعشق نوع يعنى واحد بيحب المرسيدس واحد بيحب ال b m w وهكذا لكن بعد السبعينات حاجة زى لعنة الموسيقى نزلت على السيارات ودخلت السيارات اليابانية واليوم كل الماركات بقت شبه بعض زى الاغانى يعنى لو نزعت الماركة من على السيارة مش حاتعرف دى ايه
اما عن ظاهرة وجود جمل باكملها انا بالطبع سمعت كذا جملة كاملة من اغانى عبد الوهاب وبليغ فى اغانى تركية ولكن عشان اقدر اتكلم لازم اسافر تركيا واشوف الاغانى دى نزلت سنة كام ومثيلتها المصرية سنة كام ونعرف مين اللى نزلت الاول يبقى التانى هو اللى سرقها
لكن من المستبعد ان اى ملحن عملاق يتعمد يسرق لأنها بتبان بعد فترة ,,, لكن فيه برضو شىء خطير .. فى السبعينات ايضا وقبل الاقمار الصناعية والفضائيات , لما حصلت طفرة فى انتاج اجهزة الراديو كاسيت العالية الحساسية .. انا كنت بالليل لما اكون زهقان اقللب فى محطات الراديو الاقى موسيقى شرقية جميلة جاية من تركيا تسمع الصوت جاى من وراء البحار وكان بالطبع سهل اى حد يسجل ... هنا اتسرقت بعض الاغانى التركية نظرا لن الحرامى متأكد ان الحاجات دى مش اى حد بيوصل لها .. لكن الفضيحة حصلت بعد الفضائيات لما عشنا مع المحطات التركية الكثيرة ... انا شخصيا اكتشفت كذا اغنية مسروقة بالكامل من اولها لاخرها
بس فى الحان ملحنين من الدرجة الثانية .. واحيانا بيحصل العكس .. يعنى واحد فى اليونان سرق مقدمة رسالة من تحت الماء .. المشكلة مين اللى نزل اللحن الاول
اتمنى ان اكون قد وفقت مع اطيب تحياتى عادل صموئيل