[dorame]

المشاركة الأصلية كتبت بواسطة عادل صموئيل

احبائى
اقدم لكم اليوم عمل افتخر بأنى دونته
عمل من العيار التقيل جدا , او تقول من اعلى عيار على الاطلاق
اقدم

اقبل الليل
يعنى العمل ده استغرق منى وقت طويل فى التدوين , وبالذات لأن السنباطى لما عمله وضع فيه كل امكانياته تحفيظا للفرقة بالعود , وماكانش عامل ان حد ممكن يدونه فى يوم من الايام , ومن هنا تأتى الصعوبة ان فيه جمل من الصعب تتدون , بس خلاص انا اتعودت او متخصص فى الحاجات المستحيلة دى , بس اهم شىء انك قبل ماتحاول تعزفه انك تكون حافظه من التسجيل اوى , عشان فيه سرعات كتير مختلفة , وخدع مقامية كتير , وأدليب كتير جدا حاولت بقدر الامكان انى اكتب اللى ممكن يتكتب على ميزان تسهيلا للقراءة
لو انت عملت دراسة متعمقة فى اعمال كل ملحن من العمالقة حتلاقى شىء غريب جدا , ان السنباطى لو عمل 900 جملة فى مقام البياتى , مع ان المقام واحدوالفرقة واحدة حاتلاقى ال 900 جملة لهم 900 نكهة مختلفة , يعنى كان العملاق مش بس بيبدع فى التلحين ولكن كمان بيبدع فى الإخراج , يعنى كنا حتى فى الفرقة المسية وقدامنا نوتة كنا بعد مانقرا الجملة يمسك العود ويقول اسمعونى انا عايزها كده , كنت تلاقى البياتى مش بياتى اللى بنقوله كل يوم , فيه عفريت , ولما تكتشف العفريت ده تتجنن , تلاقيه لعب فى نغمة ال لا نقصها كوما , او اى نغمة تانية يعنى ينقصها شعرة او يزودها شعرة وبتختلف من لحن لآخر , ويمكن دى من اهم مميزات عزفى المتواضع على الكمان , مش حقول انا عازف شاطر اوى لكن تميزى انى حافظ العفاريت دى , يعنى من كتر ماعزفت مع كل العمالقة ودونت لهم شخصيا فى حياتهم , طبعا فيه الحان كتير سمعتها اصلا من الراديو طول عمرى قبل ما اشتغل معاهم , بالخبرة اكتشفت العفاريت دى , اما اقبل الليل فيه نكهة متميزة جدا على اللحن كله , ان كانت الآلات اللى اصلا مش شرقية اللى زى الاكورديون مثلا , كاطانتش بتعزف مع الفرقة طول اللحن يعنى ممنوع , بيعزف الصولو بتاعه ويسكت , يعنى كتير جدا كنا نروح اسكندرية فى حفلة مافيش فى الالحن صولو اكورديون
كان مختار السيد الله يرحمه بيدينا الدوزان , ويقعد على المسرح بدون ان يقول اى جملة , لأنه لو عزف حا يبوظ نكهة الكمنجات لكن حلاوته وتميزه فى الصولو , طبعا الاورج والجيتار نفس الموضوع , فى اقبل الليل السنباطى قلب الموضوع خلى مجدى الحسينى يعمل الاورج صوت اورغن كنيسة , وخلاه يعزف طول اللحن من اوله لآخره
لذلك تحس اللحن فيه حاجة كده جاية من فوق , تحس انك فوق السحاب مش على الآرض بالذات فى الكوبيليه بتاع يا بعيد الدار عن عينى ومن قلبى قريبا
اتمنى ان تسعدوا بالنوتة , واتمنى زى كل مرة ان كلمكم تحاولوا تعزفوا فيها , يعنى اكبر مكافأة على تعبى الكبير فى التدوين , ان اقل واحد عزفا او مبتدىء انه يعزف منها جملتين يعنى احس كانى اخدت مليون جنيه
مع اطيب تحياتى

في تحليل اغنية اقبل الليل ارى تحليل رائع وجميل وجذاب بحيث اني ان لم اعزفها من قبل لصعوبتها وكن تحليلك جعلني اعزفها وبحرافها وبدون خوف
من ناحية اخرى انصفت السنباطي بالحانه الخرافية حيث اني احب هذا الملحن العبقري الذي لم ولن ياتي مثله في تاريخ الفن ابدا وكنت في بعض تحليلاتك لبعض اغاني الاستاذ عبدالوهاب احس انك تفضلة اكثر اعلم ان لكن عبقري في زمن كلثوم له مدرسه خاصة ونكهة خاصة ولا يستطيع احدا ان يفضل واحد عن الاخرولكني وبصراحة احط السنباطي في كفة والبقية في كفة اخرى فارى السنباطي محيط من علم الفن والحن والاخرين بحار كبيرة في عالم الفن فلا اعلم ما هو راي استاذنا الفاضل عادل صموئيل فاني احب اي تحليل او مدح للسنباطي واظهار معلومات جديده وفعلا انا اقول ان السنباطي عندي عفريت يلحن له والبعض يقول عن بعض الاغاني ان ما يلحنها الا محشش ولا اقصد محشش هنا للذم ولكن رمز للسلطنة الكبرى
كما ارى ان السنباطي لم ياخذ حظه من الاعلام كما اخذه اسطورة الفن عبدالوهاب او بليغ وغيرهم فارى ان السنباطي والموجي ايظا ظلموا بعض الشئ اعلاميا
وعندي سوال للاستاذ الذي بقى لنا من الزمن الجميل للفن وهو عادل صموئيل هل كنت تحس ان السنباطي طبيعي ام لا لان الحانه ليست طبيعية ابدا
وعفوا على الاطالة وشكرا
اخى العزيز
التلحين ده موهبة من عند الله ,, والموهبة بتختلف من شخص لآخر يعنى المنحة من الله بتكون لشخص متواضعة وشخص آخر عالية وبدرجات . اما عن السنباطى وانا عرفته عن قرب لفترة طويلة كان شخص متواضع غير محب للظهور يعنى كان من الشغل للبيت لم اسمع عنه او اراه فى حفلة لرواد حفلات المجتمع ولم يظهر فى احاديث تليفزيونية الا مرة واحدة فى حياته الطويلة ولم يكن محبا للظهور .. وكان متواضعا جدا فى ملبسه ومظهره يعنى فنان بمقام السنباطى المفروض يركب سيارة آخر موديل ولكنه كان يركب سيارة قديمة موديل 1945 .. وهو لم يدخن فى حياته او يشرب اى نوع من الخمور .. وللعلم من يقول ان المخدرات تصفى الذهن وتصنع العبقرية هو واهم بالعكس المخدرات تدمر المشاعر والعقل .. اما عن السنباطى بيرجع الفضل فى عبقريته فى الموسيقى الشرقة النشأة الدينية والتصاقه بالموشحات والادوار والقصائد الدينية القديمة فهى مدرسة من اروع المدارس فى الموسيقى الشرقية لأنها تتعرض بالذات للمقامات الصعبة والغير متداولة .. وتظهر فيها روعة الأداء وبالذات باللغة العربية الفصحى وذلك ما جعل السنباطى ملك تلحين القصائد الصعبة على الاطلاق .. والموسيقار الفذ لا يكتفى بالبداية ولكنه يستمر فى الدراسة فدرس الموسيقى الغربية حتى يكون موسيقار عالمى غير محدود بنوعية من الموسيقى دون غيرها وترى المزج فى الحانه بين الموسيقى العربية على اعلى مستوى وادخال الايقاعات الغربية .. واهم شىء فعله انه لآخر لحظة حافظ على الموسيقى العربية من اقتحام موجة الغزو الاوروبى عليها
مع اطيب تحياتى ادل صموئيل