[عادل صموئيل]

احبائى

اسمحوا لى ان اتطفل عليكم فى هذه الصفحة الجميلة
واشكر الاخ العزيز احمد الجوادى على مجهوده
لاحظت سؤال الاخ العزيز ارمندو عن التقسيمة فى مقطوعة ذكرياتى

من وجهة نظرى انا طبعا ماكنتش موجود ساعتها لكن اقدر اتخيل اللى حصل لنى شفت السنباطى بيسجل كتير واقول لك اللى شفته وممكن جدا نطبق الكلام ده على القصبجى

كان السنباطى من الملحنين المعدودين على اصابع اليد الواحدة اللى لما بيسجل فى لاذاعة اى لحن ( بالطبع خلو بالكم بعد سنة 1945 يعنى بعد ما الاذاعة ابتدت تسجل على الشرائط ) لأن قبل كده كانوا بيسجلوا على اسطوانات الشمع اللى بتنطبع بعد كده على الاسطوانات اللى بيسموها الحجارى ال 78 لفة وكان زمن الاسطانة محدد جدا
لكن لما ظهرت الشرائط الريل وظهر معاها بالطبع فن المونتاج وكان التقطيع بالمقص هنا اعطى فرصة انك تخرج عن الزمن المحدد بالاسطوانة وهو حوالى 3 دقائق لكل وجه
من هنا اصبح الملحن يبدع زى ماهو عايز ويطلع كل اللى جواه والوقت مش سكين على رقبته
لما نشوف السنباطى كان بيعمل ايهكان فى اوى كل لحن عادة بيجيب معاه العود بتاعه ويعزف تقسيمة
وبراحته زى ماتطلع لأن ده السنباطى جاى من بيتهم متسلطن جاهز وكل جرة ريشة على العود فيها ابداع
بعدين كنا بنسجل اللحن
وبالنسبة لإذاعة اللحن بعد كده كان فى البرامج المتخصصة زى غواص النغم كانوا بيذيعوا التقسيمة
لكن التقسيمة مش مرتبطة باللحن اصلا يعنى ممكن تبتدى اللحن من بعدها يعنى عارف زى ف الافلام العربى
لما يحطوا رقصة او خناقة ممكن تتحذف لكن مالهاش تعطيل فى سياق الفيلم
اعتقد ان القصبجى عمل كده بس هو وضع التقسيمة فى منتصف اللحن ومن هنا اصبحت وجوبية يعنى الناس حفظت اللحن بالتقسيمة .. لكن احيانا ممكن حد يعزف اللحن من غير التقسيمة مش حايحصل حاجة
بمعنى ان لو عايزين نقول المقطوعة بسرعة مانعملش التقسيمة او عازف مش حلو فى التقسيمة يعزفش التقسيمة
فيه كمان ملحوظة تدل برضو على كلامى ان التقسيمة هنا مش وجوبية انها مش مبتدية بنكهة اللحن يعنى مش واخد جملة من اللحن الاساسى وابتدأ منها التقسيمة بعدين كمل تقسيم وده الشائع فى الموسيقى الشرقية واديكم مثل :
اسمع الكوبليه التانى من رسالة من تحت الماء الحفناوى لما جه يقسم اخد جملة من اللحن وابتدا منها وكمل من هنا التقسيمة وجوبية
يعنى لما نعزف الكوبليه ده لازم نعمل التقسيمة وكمان عشان الجملة اللى اخدها دى اصبحت التقسيمة دى بتاعة اللحن ده يعنى ما اقدرش اقصها وآخدها على انها تقاسيم على الكمان للفنان احمد الحفناوى واذيعها لوحدها
لكن تقسيمة القصبجة طالما ان ماعليهاش بصمة او علامة انها من مقطوعة ذكرياتى ممكن انك تقصها وتذيعها لوحها كتقسيمة للقصبجى
انا آسف للإطالة لكن حبيت اقول وجهة نظرى وقد تكون صحوقد تكون خطأ ... يعنى بحط احتمال
مع اطيب تحياتى عادل صموئيل