[عمرو الهنداوي]

أستاذ عادل انا عندى سؤال لحضرتك

عبد الوهاب كان بارع جدا فى الموسيقا البحته وكان بيعمل مقدمات موسيقية طويلة وهايلة وكذلك بليغ وفريد
طيب ليه مافكروا يعملوا سمفونيات وكنشرتوهات عربية شرقية خاصة بيهم زي عظماء الموسيقا فى الخارج

الجندول والكرنك وعاشق الروح ونجوم الليل وغيرهم بحس انهم كانوا ممكن يكونوا بدايات سمفونيات وكنشرتوهات

حضرتك رأيك ايه؟ وكانوا بيفكروا ازي فى الحتة دي؟

كل التحية
عزيزى عمرو
انا قريت كلامك وفكرت وقت طويل اكتب لك ايه
اولا ربنا لما خلق الفواكه ليه خلق انواع كتير ماخلقش نوع واحد ؟
ثانيا السواح لما بيروحوا يزوروا بلاد تانية بيروحوا ليه اكيد عشان يشوفوا الشىء المختلف اللى مش عندهم
الموسيقى الكلاسيكية بتعتمد على سلمين فقط هم الكبير والصغير لذلك عشان يحصل تاليف كتير لازم تعمل تنويع على الخامة نسها وهى السلالم دى لذلك تلاقى الموسيقى هناك اهم حاجة فيها الهارمونى مش الميلودى ... يعنى تلاقى السيمفونية فيها حوالى عشر جمل موسيقية وانت بتسمع 45 دقيقة فى الهارمونى المصاحب للجمل دى
لكن فى الموسيقى الشرقية طابع تانى خالص يعنى احنا تخيل لو عندنا مقامين فقط زى العجم والنهاوند فقط ... لكن لما يكون عندنا 47 مقام وايقاعات مالهاش عدد
هنا قيمة التأليف الموسيقى فى حلاوة الميلودى والهارمونى عندنا حاجة ثانوية
يعنى لما تسمع اغنية واحدة زى انت عمرى وتعالى نعد فيها كام جملة موسيقية حتلاقى مش اقل من 120 جملة ... وقيمة عبد الوهاب انك حتلاقى كل جملة حلوة
يعنى لوجملة نص نص بتوقع الكوبليه كله ..
والمؤلف الشرقى دماغ تانى غير المؤلف الغربى وبالذات فى كمان طريقة او تكنيك العمل .. المؤلف الشرقى بيلحن على العود وامتى يحس انه الف جملة حلوة ؟ لما يسمعها كتير ويحس انها حلوة وجديدة
اما المؤلف الكلاسيكى بيألف على الورق .. يعنى بيتهوفن كان بيجيب الوق ويالف السيمفونية كتابة .. حتى الدليل انه فى منتصف حياته اصيب بالصمم التام ومع ذلك عمل بعدها اربع سيمفونيات كبيرة غير الحاجات التانية .. طيب سمعهم ازاى ؟ وهو بيقرأ النوتة بيسمع بعينه
وانت لو عملتجولة حول العالم حتلاقى كل بلد لها فنها واللى لازم تحافظ عليه لنه قيمتها .. والكارثة الخطيرة اللى حصلت فى ال 50 سنة الاخيرة ان كتير من دول العالم الثالث حبوا يقلدوا اوروبا وطبعا رقصوا ع السلم لا عملوا فن ولكن خربوا فنونهم .. يعنى مثلا فى الهند كان عندهم موسيقى تجنن .. فجأة قلبوا ديسكو يعنى تركوا آلاتهم الموسيقية الجميلة واللى مفيش حد غيرهم فى العالم يعرف حتى يعزف عليها واللى عملت طابع يخليك اول ماتسمع اول حرف تقول ده هندى .. وبقت موسيقاهم الحديثة كلها كهربا ودرامز .. طبعا مش حايوصلوا للأوربيين وفنهم ضاع
مع اطيب تحياتى عادل صموئيل