[عادل صموئيل]

الاخت العزيزة انغام الشرق
اقدم اليكى الملف الصوتى بتاع اكورديون ثانوى اللى انتى طلبتيها
هى موسيقى من فاتت جنبنا لحن محمد عبد الوهاب وغناء عبد الحليم حافظ
فيه ملحوظة هم كاتبين السرعة بريستو 160 اعتقد عشان تدربى عليها طلابك كده تكون صعبة شوية
انا عامل لك كذا ملف الملف الاول سرعة 140
الملف التانى سرعة 140 بالمترونوم
الملف الثالث سرعة 160 وممكن تخلى طلابك لما يتقنوها يسرعوها السرعة المعقولة

وجدير بالذكر يعنى احب اقول حاجة جوايا وتبين الفشل اللى بيحصل فى جزء من وزارة التربية والتعليم وبالطبع بيبن الفشل اللى بيحصل فى الاجزاء التانية من الوزارة فى المواد التانية
المقطوعة دى اتعملت كذا مرة قبل كده مع ان فيه ناس لسه موجودة ولسه ممكن تقدم الاحدث بما يعطى اثراء للمدرس .. يعنى مدرس الموسيقى لما يبقى عنده 200 مقطوعة غير لما يكون عنده عشر مقطوعات يفضل يعيد ويزيد فيهم
بس نظام الوزارة مش بيتعامل مع الكفاءات اللى على المعاش ... انا شخصيا من سنتين لما طلبت منى الاستاذة المستشارة اعمل المسابقة بعدين قالت لى مش حانقدر نديك فلوس ( ومع انهم شوية ملاليم يعنى انا حتى لو اخدتهم الاخلاص فى العمل بيخلينى ادفع من جيبى قدهم عشر مرات ) وقلت لها انا مش بشتغل عشان الفلوس يا استاذة انا بشتغل عشان اقدم فن حلو يستفيد منه مدرسين الموسيقى يعنى انا عزفت مع العمالقة واعرف اغانى المرسين العاديين مش بيتداولوها واقل حاجة انى من مكتبتى الموسيقية ممكن اختار اى لحن يعجبنى وادونه واجهزه للمسابقة
وحصل من قبل ان كل المسابقات اللى عملتها جبت الحان جديدة ماحدش جه على باله يستعملها من قبل ده كمان بالإضافة ان التعامل الطويل مع العمالقة ادانى ذوق حلو فى الاختيار يعنى كل مرة والموجهين الاوائل بتوع الجمهوريةفى الاجتماع اللى بيستلموا فيه المسابقة بيقعدوا فى قاعة اجتماعات وبنسمعهم شريط المسابقى كانوا بيتجننوا من حلاوة الاختيارات ... المهم انا قلت لها انا مش محتاج فلوس ( وكان معايا المرحوم الاستاذ فتحى شكيب اللى عامل المقطوعة دى ) كان عامل نشيد جميل للحضناة ومقطوعات الاكورديون ونشيد اعداى وثانوى وانا وزعتهم
واقنعتوا انو هو كمان يقدمهم هدية للوزارة لأنه على المعاش وكان معانا الاستاذ لورنس وقدم مقطوعتين للجيتار وكان معاش برضو ... يعنى المحزن انهم بيتجاهلوا الناس اللى لسه ممكن تقدم الجديد والجديد والاحلى وبيقعدوا يكرروا الحاجات القديمة وبعدين اهم حاجة انا كنت كل مسابقة بسجل فى بيتى شرائط كاسيت اتنين لكل محافظة عليهم الملف الصوتى لكل المسابقة ومعمول بطريقة احترافية برضو عشان كل موجه اول ياخد الكراسة ومعاها التسجيل عشان ما يبقاش حد عندو اى مشكلة وكمان كنت سايب لهم كل تليفوناتى عشان اى استفسار
مع اطيب تحياتى