[ALY ELHELALY]

.

المشاركة الأصلية كتبت بواسطة ALY ELHELALY

لحظة ألم

كتير في الغربة قابلوني
وسألوني عن الحيره
وسر الحزن في عيوني
ضحكت وقلت مش سيره
ولا حكايه هنحكيها في غربة ليل
مفهش صحاب ولا جيره

كتير في الغربة بتألم
ولا عمري شكيت مره
ولا لحظة بكيت فيها
ولا قلت الكاسات مـُره

داريت الحزن جوايا
وخبيته عن أحبابي
رسمت في وشي ضحكايه
رسمت الفرح فوق بابي
وفي عنيا الدموع باينه
ولو لاحظوا بقول فرحة
دموع فرحة
وبمسحها بإيدين خايفة
وأداري شوق عيون سارحه

وأعيش الغربة وأتعلم
وبشرب كل يوم مـ الكاس
وقلبي يقاسي يتألم
يقابل ناس يودع ناس
ساعات بيمل
أو يزهق
ساعات يصرخ
ساعات يحرق
وأعيش لحظة ألم مش يأس
بعيش لحظة ألم
مش يأس

(2)


وبنحاول نعيش في الغربة
ونرضي بالمكتوب علينا
حلوة مره إيه هتفرق
والدموع ساكنة في عنينا

ضحكة كانت أو ألم
أو حتى بحر من الندم
لو هنشكي من المواجع
تفتكر هيحسوا بينا

مين هيسمع شكوة الموجوع
وهو في دنيته وعايش حياته
مين هيمسح دمعة المجروح
يحس بوحدته دقات ساعاته

مين هيتندم عشانه
مين هيتألم مكانه
قسمته وبخته في زمانه
والزمان أهو حر فينا
هنرضى بالمكتوب علينا

(3)


قسمة كانت إننا
نبعد نفارق
حظـــــنا
ونسيب قلوبنا لوحدها
مع ذكرايات بتهزنا

غربه وغريب
فيها في لهيب
عايش على ذكرى اللي فارقهم زمان

عايش ومش عايش
وحــــيد
في أحزان في يوم عن يوم تزيد
وأحساس بخوف ومهوش جديد
في الغربة فاقدين الأمان

عايش ألام معظم كلام
الغربة يحكي في ذكرايات
يحلم ببكره فيه حبايب
أه حبايب
مع صحبه حلوة
يعيش ساعات
ولو سألتو كل غايب
تتمنى إيه ؟
يتمنى يرجع للي فات

ذكرايات
هي الأمل بتصبر المجروح في جرحه
ذكرايات
هي الطريق بتوصل المهموم لفرحه

ذكرايات
ومفيش لنا في الغربه غيرها من اللي فات
ذكرايات
ومفيش لنا في الغربه غيرها الذكرايات

ذكرى لحبايب غبنا عنهم من سنين
ذكرى لصحبة وجيره حلوة
وناس قلوبهم طيبين
ذكرى لتراب الأرض
ذكرى و شوق حنين
لنسمة هوا
محلى عبيرها في أرضنا
وأهي قسمة كانت إننا
نبعد نفارق
حظـــــنا
ونسيب قلوبنا لوحدها
مع ذكرايات بتهزنا
في لحظة ألم

(4)

والغربة مش بس فراق
ولا لحظة بنعيشها إشتياق
ولا سكة فيها يطول سفر

ولا غيبة بنغيبها لسنين
ولا دمعة نبكيها بأنين
ولا ليلة نقضيها في سهر

ممكن تكون الغربه إحساس
جوه منك
وإنت بين أهلك وناسك
وقت ما تحس إن عطشك
زاد تدور
وسط كاسات المحبة
ومتلاقيش في الحب كاسك

وهي دي الغربة اللي تحرق
واللي تسرق فرحتك
اللي تلاقيها فوق شفايفك
إيد بتخطف ضحكتك
وقوام ساعتها تحس إن الدنيا دي
رغم إتساعها
ديقة ومش من مقاسك
.
علـ الهلالـ ـي