[salhi_haithem]

السلام عليكم ورحمه الله وبركاته
الى الامام استاذ عادل امتعنى بانتاجك الفني و العلمي و احنا معاك يا ريس و في انتظار جديدك... و جملتك الجميلة التى قلتها تكتب دموع العين حقيقة "انا راجل بتاع شغل يعنى بحب اشتغل اكتر مما اتكلم" .. و انا اتذكرت قصة لشيخ من المشايخ و العلماء حين ذهب الى المانيا للعلاج و هو كان يعاني من ذبحه قلبية و كان ذهابه خلسة الى المانيا بعيد عن الاعلام فحين وصوله كان الناس يتوافدون من كل مكان "من فرنسا و ايطاليا و اسبانيا" و كان الوفد الذي يصاحبه يعتذرون للناس لان صحة الشيخ لا تسمح و كان الشيخ حين يسمع صوت الناس يقول للمرافقيه استقبلوهم و كان يستقبلهم و يتحدث اليهم .. ثم اجرى العملية الجراحية و بقي اسبوعين في فترة نقاهة الى ان قال الى مرافقيه جملة عجيبة "انا لا اريد ان ابقى على هذه الحال بل اريد ان احياء" فأقاموا له عدة مؤتمرات و ندوات دعوية .. فكان يخطب لساعات و كأنه في صحة جيدة.. مختصر الحديث و العبرة ان حياته في الدعوة رغم المرض و كان يحس بالحياة في الدعوة و لا يكترث للمرض امام ما يحب فعله
هيثم
اشكرك يا هيثم
بالفعل انا كل يوم حتى لو مريض بموت لازم اكتب ولو كام سطر ولو تشوف على جهازى فيه نوت كتير من الاغانى اللى انا مش بفضلها اوى شغال فيها يعنى كل كذا يوم بكتب فيها حاجة لحد ما اخلصها
اما النوت اللى بفضلها دى خارج النطاق يعنى اغنية الويل الويل انا بحبها جدا اول ما قريت الطلب ابتديت فيها وخلصتها بعد ساعتين
والشىء الاهم ان فيه اغانى من الصعب ان حد يكتبها غيرى اولا عشان اشتغلت فيها وحافظ كل حرف وثانيا لو جبت افضل مدون فى العالم وقلت له اكتب اغنية 22 صفحة
بدون مقابل اكيد مش حيوافق لأنه حايقول فى الوقت اللى ادونها فيه اكون كسبت كذا الف جنيه ... وانا طول عمرى الفلوس مش فى مخى يعنى بكتب النوت واضعها فى المنتدى ومش عارف ممكن توصل لمين او فين ولكن اتمنى ان تصل الى كل الدنيا لأن فيه ناس اعتقد ممكن يستفيدوا منها ... وللعلم الاغانى اللى عدد صفحاتها كبير يعنى مجهدة جدا جدا وحتى لما انتهى من التدوين المراجعة بتكون محتاجة ذهن اكتر من التدوين يعنى فيه حاجات خطيرة جدا جدا زى الدليل اللى بيكون فيه علامة شرقية نصف بيمول بتتوضع بعد ما اللحن يخلص وانا اثناء التدوين بعمل لنفسى حاجة تبين ان المى نص بيمول مثلا تبدأ من كذا الى كذا وماينفعش اضع العلامة اثناء التدوين لأن لو عملت اى اختصار فى التدوين الشرطة بتتحرك وتلزق فى مكان مش مكانها واحيانا مش ممكن تنمحى تبقى النوتة فسدت كلها لننا بنتحايل على تصميم البرنامج نفسه لذلك لازم اكتب اللحن كله واستقر على الشكل والاخراج بعدين اضع العلامات الشرقة اللى فى الدليل
اما بالنسبة للإخراج برضو ده مشكلة يعنى فى لحن عسل وسكر مثلا هو طلع صفحتين وسطرين المفروض انى ممكن على الكمبيوتر ادخل او اسحب السطرين الزيادة على الصفحتيت عشان العمل يبقى صفحتين فقط ولكن حسيت ان شكل اللحن حايبقى مزنق شوية ... وللعلم انا بقرأ كل كلمة بيكتبها الاعضاء الاعزاء يعنى واحدة قالت لى من مميزات نوتى انها الموازير واسعة حلوة فى القراءة مش مزحومة وللعلم الزحمة ممكن تخليك تغلط مع السرعة يعنى لو تلاحظ لو انا ماشى كل مدرج 4 موازير لو جت مازورة زحمة يعنى فيها ايقاعات كتير بعمل طرد مازورة للسطر التالى ويبقى السطر 3 موازير
بس الموازير واسعة عشان تكون سهلة وواضحة يعنى المجهود مش تدوين فقط لكن حاجات تانية كتير ... ساعات بكتب لحن فى سرعة 100 بعدين اكتشف بعد خمس سطور ان شكلو صعب على المبتدئين بمسحه واكتبه تانى على سرعة 140 عشان تبقى لايقاعات اسهل اسا الموضوع انى بحب شغلى مش بشتغل عشان اى فائدة مادية
حتى فى الردود عليكم فيه ناس بنزل مواضيع وتستجدى الردود يعنى ينزل موضوع وكل ما واحد يرد عليه يرد هو عليه والتانى يرد تانى ونفضل موضوع واحد عليه 500 رد
انا هنا برد عليك لأنك فتحت موضوع ... لكن الردود العادية انا بقراها وحبكم فى قلبى لكن مش برد عشان ما ازودش عدد الصفحات والنوت تضيع وسط الزحمة
وعايز اقول حاجة طريفة جنب بيتى محل فول وطعمية بيشتغل فيه 3 اشقاء عندهم مرض الرغى والتوقف عن العمل يعنى لو هو بيعمل السندويتشات وواحد سأله سؤال يبطل شغل ويقف يرد ربع ساعة ونبهته كذا مرة انو يتكلم وهو بيشتغل بس مش نافع والمصيبة ان ال 3 اشقاء فيهم العادة دى المشكلة ان الصبح بيبقى فيه تلاميذ مستعجلين على الساندويتشات عشان يلحقوا ميعاد المدرسة
مع اطيب تحياتى عادل صموئيل