[لؤي مجيد العاني]

السلام عليكم
خلال تسجيل مقام المدمي دخل علينا الى غرفة الكونترول في الاستوديو التلفزيوني الدكتور عبد القادر الدليمي وكان المخرج على ما اتذكر اثير عبد الوهاب
اخذ المخرج اثير يتنقل بلقطات مابين الكامرات الثلاثة وفي كل منها كان يركز على احد المشاركين لغرض اثارة الدكتور عبد القادر هنا قال ( اثير متكلي اشلون اجمعت كل المعارضة بهذا التسجيل واجمالة كل واحد ضد الثاني ) هنا اجبته دكتور كلامك صحيح هم مختلفين بس ترة اتوحدو كلهم ضد حجي هاشم الرجب وبعد انتهاء التسجيل تحولنا الى الاستوديو وتحدث الدكتور عبد القادرالى المتواجدين قائلا بان الحاج هاشم يقدم في برنامجه ما لايقل عن اثنين من قراء المقام والقارىء الوحيد الموجود هنا هو الاستاذ عبد المجيد العاني اجابه العاني فورا لا دكتور اليوم اكو اثنين مو واحد التفت الى الحاضرين باحثاعن القارىء الاخر قائلا منو الثاني فقال العاني اكبالك ابو هيثم اليوم هم راح يسجل مقام
الحقيقة وقعنا في حيرة انا والمخرج اثير لكون حجز الاستوديو لقارىء واحد فقط وكذلك المرحوم شعوبي ( ابو هيثم ) تفاجا بالموضوع تركنا الدكتور عبد القادر قائلا اثير من اتكمل جيبلي التسجيل علمود اعتمدة بالبث
وبعد تركه للاستوديو تحدث الفنان شعوبي لعبد المجيد العاني قائلا اشلون ورطة ذبيتني بيهة فقال العاني لاورطة ولا شي اشو انت ابو هيثم كبلنة بسنين واضبط واحد بالعزف وضابط قطع واوصال المقام لو اتريد تقرأ المقام ترة انت احسن من عدنة وشجعه بهذه الكلمات وفعلا قرأ شعوبي ابراهيم ( ابو هيثم ) وعلى ما اتذكر كان مقام الاورفة
وبعد ايام بث التسجيل
اما تعليق المرحوم يوسف عمر عند مشاهدته للتسجيل فقد قال لشعوبي ( جعوب اذا انت كمت تقرة مقام وتسجل اني راح اترك المقام ودك على الجوزة . واكمل يوسف عمر الحديث قائلا انت مالك ذنب هاي السوالف كلها من ابو لؤي ايريد كل الناس تقراء مقام .