[guest]

استاذ عادل المحترم /

أنا ما اتضايقتش خالص من كل كلام حضرتك

و لكن اقول لسيادتك انا اتضايقت ليه و من ايه

1.أنا اسمي ايهاب علي فكرة ( كلمة الاخ العزيز ) بصراحة بتفكرني ب حاجتين
السوفيت : الاخ مش عارف مين و الرفيقة ام عطيات بتاعة الطبقة العاملة الكادحة علي رأي فيلم عادل امام
واخوة تانيين لا داعي للتفسير حيث ان المنتدي ممنوع كلام قي سياسة
و كلمة اخ دي بقي بتنرفزني انا شخصيا و بتدل علي عدم تقدير او احترام .. كأن واحد في الشارع و يقولك : انت يا اخ , من غير حضرتك او استاذ او الكلام دة .. طبعا حضرتك استاذنا .. و قد اكون اصغر من اولادك و طبعا مش مستني من حضرتك تقوللي حضرتك او استاذ .. كفاية عليا تقوللي اسمي عادي .. ايهاب .. من غير اخ و لا سلاطات و بابا غنوج .. حضرتك او اي صديق في المنتدي يقوللي ايهاب عادي من غير استاذ .. الواحد مننا هيموت و لسه مخلصش علام و قراءة
دي واحد

2.لعلم سيادتك انا قريت كويس جدا جدا قوانين سماعي قبل الاشتراك فيه وبعد كلام حضرتك عن الممنوع .. و ما لقيتش فيه كلمة واحدة بتقول ممنوع الكلام في فلوس .. ممنوع الكلام في سياسة و دين و انا متفق معاهم في الموضوع ( الدور و الباقي علي الاخوة اللي واخدين الدين سياسة و انتخبني عشان تدخل الجنة .. ملحوظة : انا مش بتكلم في سياسة )

3.فيه حاجات كدة بتغيظني .. كلمة ممنوع .. يعني ايه ممنوع ؟ انا مش بحب الكلمة دي .. بتدل علي قلة الطموح و الاكتفاء باللي وصلت ليه .. لو كل واحد شال كلمة ممنوع من حياته هيلاقي نفسه بيبدع .. يا استاذ عادل حضرتك فنان كبير .. يعني علي حسب كلامك قلنا ممنوع .. لو كان عبد الوهاب فكر ان التانجو ممنوع عشان غربي .. ما كانش قدم لنا واحدة من احلي الحان التانجو في العالم و شرحه فريد الاطرش اللي عمل يا زهرة في خيالي غناها العالم كله و بالعربي علي غير لغتهم الاصلية !

4.انا معاك ان احنا في ايام خايبة .. بس الايام خايبة , نخيب معاها ؟ و لا نغير احنا من تفكيرنا ؟
انا ملم بالوضع في مصر و برة مصر و متابع و سمعت عن الفضايح اللي بتقول عليها بأمارة انها خلصت عن طريق المشير .. اللي هتلر قاله .. انا كنت فاكر نفسي نازي , طلعت يا واد يا طنطاوي استاذي ( اكرر مليش دعوة بالسياسة )

5.حسيت من تعديل كلامي باللون الاحمر انه ما تتكلمش تاني و ما تصدعناش .. و انا احبطت جدا جدا عشان حضرتك اجهضت الفكرة من غير دراستها دراسة مستوفية .. قد يكون فيه اعتراض علي حاجات .. نتناقش فيها .. ندور علي حلول بديلة

علي حسب فهمي .. مؤسس المنتدي مش مصري .. دا خلاني تركب في دماغي الفكرة اكتر و اكبر .. و ان سماعي تبقي ليها كذا فرع في كذا بلد عربي ( ليه لأ يا عادل بيه ) هو الحلم ببلاش ؟ .. ازاي دي .. عاوزة قعدة و كلام كبير و قصة مع الحفاظ علي سمعة المنتدي و انه مجاني للناس .. لكن فكرتي اكبر ب كتير من مجرد صفحة علي النت .. انا كان قصدي ننزل لأرض الواقع و نملا الدنيا مزيكا .. في الشوارع .. الميادين .. علي الكورنيش .. كل حتة

اسمحلي اعزم نفسي علي واحد قهوة مغلية من غير وش و 2 حجر طومباك في اول زيارة ليا ل مصر ( و ان كان دة مش عن قريب يعني ) .. و نتكلم بقي في كل حاجة

6.انا عارف كل حاجات البكش دي و تجيب حزام تخسيس و يسلخ وسطك ..
انا موافقك انا ال 10 جنيه و لا ليها قيمة .. و انا معاك انا ال 100 جنيه تفكها الصبح من البنزينة تخلص قبل العصر
بس علي فكرة يا استاذ عادل .. مش بس البنزينة اللي تحت بيتك ب تتميز بان علي طول عندها فكة
دا كل البنزينات علي مستوي العالم بيتميزوا ان عندهم فكة
و ان كان الميزة في مصر بقي ان البنزينة 24 ساعة فاتحة

يا سيد عادل .. احنا هنعمل جمعية موسيقية باسم سماعي و هتشوف و هتكون مشهرة ( زي كدة جمعية محبي العندليب )
دا حضرتك بذات نفسك بتشتكي من الروتين .. تيججي تقوللي ممنوع والادارة ؟ ابعد الفنان عن الروتين يديلك احلي شغل
النجوم برة وراهم مؤسسات .. احنا بقي ورانا مين ؟ ورانا الممنوع و الادارة ؟ مش عايزهم و ما يلزمونيش

الدور و الباقي علي الجمعيات اللي بيعملو نشاطهم من غير غطاء قانوني و عدم اعلام السلطات المعنية ( فاهم قصدي ايه طبعا و انا مش بتكلم في سياسة لا احسن حد يفهم غلط )

خالص تقديري ل حضرتك

ايهاب علاء الدين

اعتمد يا سماعي و انشر خلينا نروح نعمل واحد شاي
( وحياة ربنا نفسي كدة نفسي في كوباية شاي علي مية بيضا .. بس مفيش الكلام دة هنا .. كله شاي باكيتة و حاجة يعني اسسسس ..
استغفر الله العظيم يعني ---- وانا مش بتكلم في الدين اهو )