[عادل صموئيل]

العبقري العظيم والنجم الماسي اللامع الاستاذ عادل صموئيل مساء الخيرات لحضرتك

الحقيقة اود سؤال سيادتكم بعيدا عن النوتات ... موضوع يخص احد النجوم الذين عملت انت معهم وهو الاستاذ القدير عبدالحليم حافظ رحمه الله

فلقد قرات في احد الكتب انه وافته المنية وهو على خصام مع نابغة الدهر الموسيقار الفذ بليغ حمدي ... بمعنى انهم لم يكونوا على كلام مع بعضهما البعض نهائيا .... بحكم علاقة سيادتك بالاثنين فهل هذه المعلومة صحيحة يا استاذنا الكبير

وكل الشكر لك يا افندم

اخى العزيز انا اليوم على الاخص جاوبت على سؤال للأخ العزيز عمروا هنداوى انكم ما تصدقوش كل الكلام اللى بيتفبرك فى الصحف ... يعنى بعد وفاة وردة
طلع كذا واحد فى القنوات الفضائية وقعدوا يختلقوا قصص انا كنت موجود فى الاحداث دى وماحصلتش .. عارف اغنية ام كلثوم لما قالت
خصامنا يدوب فى يومين اتنين يادوب فى يومين ؟
الكلمة دى المؤلف بتاعها كتبها من احساسه .. يعنى الفنانين دول كانوا عشرة عمر يعنى اتعذبوا مع بعض وقاسوا كل المعاناة فى الدنيا وانضربوا بالطماطم وانهزموا واتبهدلوا ونجحوا وانتصروا وتألقوا وصعدوا مع بعض .. يعنى شوف كام لحن لحنه بليغ لعبد الحليم انا حالا ما اقدرش اقول لك رقم محدد .. وكل لحن من دول كام قعدة وكام سهرة للصبح اثناء اعداد اللحن وكام بروفة وكام وقت تسجيل وكام حفلة وكام سفرية للخارج ... يعنى حتى لو حصل اى خلاف مش ممكن يستمر اكتر من يومين ... وللعلم كان عبد الحليم على خلاف كبير مع فريد
لكن عبد الحليم كان ممكن يستغنى عن فريد لكن مايقدرش يستغنى عن بليغ
مع اطيب تحياتى عادل صموئيل