[عمرو الهنداوي]

استاذ عادل ازى حضرتك

بصراحة انا عايز نصحتك فى مشكلة موسيقية وجاعة دماغى من وقت كبير اوى وكنت ناوى انقاشها مع حضرتك يوم الاوبرا بس انا ماكنش ليه نصيب اكون حاضر يومها وبصراحة مش اقدر استنى لحد ما اقابل حضرتك فى اغسطس القادم ان شاء الله

المشكلة بى اختصار هى "مشكلة السماعى" انا عارف حضرتك حتقول السماعى موهبة ومش حينفع حد يتعلمها لكن انا شايف ان الموسيقا علم وفن وموهبة من عند ربنا وانا شايف انه بعد النصائح والتدريب ممكن يكون فى تحسن بالغ فى مشكلة السماعى دى

انا اول ما اتعلمت الموسيقا اتعلمتها باسلوب التعليم الغربى يعنى نوتة والنوتة مكتوب فيها كل اللى العازف يحتاجه من الالف الى الياء وليس مسموح باى خروج عن النوتة تحت اى ظرف وبالتالى مع الوقت انا كعازف حسيت انى زى الالة فقط تاخذ اوامر محددة من النوتة وتنفذها دون اعمال اى دور للاحساس او الاذن وبالتالى مع الوقت السماعى مات واصبحت بدون النوتة عبارة عن الة بدون كهرباء لتشغلها

حضرتك عارف انه الغرب عندهم نوتات لكل شىء ولكل لحن اتعمل فى يوم من الايام وموجود باكتر من شكل ليناسب طبيعة كل الة ومستوى كل عازف وهما مش محتاجين السماعى فى حاجة لانه النوتات موجودة لكل اغنية عندهم والسماعى عندهم مبنى على الكورادات والهارمونى دون اللحن الاساسى والسماعى عندهم مش مهم وعلامة على التخلف والجهل وعدم التعليم

ولما تقول لحد منهم اعزف بدون نوتة يقول لا طبعا هات النوتة لكن احنا فى الشرق الاوسط حضرتك عارف كل بلاوى النوتات ايما مش موجودة او مش واضحة اومكتوبة بخط اليد ايما غلط ايما مكتوبة بشكل مستفز وفزلكة على الفاضى

انا شايف انه السماعى ح يساعدنى فى حاجتين مهمين جدا اولا حقدر اعزف اى جملة او اغنية انا عايزها بدون نوتة لانه بصراحة انا مش القى نوتة لكل لحن او اغنية انا بحبها ومكتوبة زى ما حضرتك بتكتبها

ثانيا تعلم السماعى حيفدنى فى الخروج من مواقف حرجة كتير لما حد يقولى ممكن تعزف اغنية كذا او جملة كذا ويكون مافيش نوتة فا بضطر اعتذر والناس بيزعلوا ويفتكروا انى بتكبر عليهم ومش عايز اعزف لهم اللى عايزنه والحقيقة هى انى انا مش قادر اعزف دون النوتة وطبعا انا مش حمشى بشنطة النوتات فى كل مكان وانا اتعودت من الموسيقا الغربية انى ما احفظ نوتات او اى جمل موسيقية وبالتالى السماعى راح من زمان

انا بعزف نوتة كويس اوى وبمجرد النظر ولو كانت نوتة لك او لاستاذ طارق او السويفى او لسيد بطلعها بنسبة 95% صح من اول مرة وبمجرد النظر لكن لو حد شال النوتة من امامى تلقى الماكنية اللى كانت شغانة وقفت وانقطع عنها الميه والنور والموضوع دة بيسب ليه احرج كبير والم نفسى بالغ

و كمان المشكلة بتكون اكبر لما اكون معزوم فى مكان ويجى حد يقولى والنبى اعزف لى جزء من اغنية كذا وساعات انا ببقى عزفت الاغنية دى كذا مرة بس من النوتة ولكن من غير النوتة مش عارف ومش فاكرها لانى مش بحفظ وطبعا انا فى الخروجة ومش معايا النوتة وطبعا بحس بحرج شديد لكن الناس ماتصدق انى مش بعزف بدون نوتة وافضل اخذ كلام يوجع القلب بقى طول الوقت انى انا اللى رافض اعزف لهم

انا جربت اسال ناس ازى اتعلم سماعى لقيت الكلام محبط زى مش ح ينفع هى موهبة او كلام متناقض مع بعضه
فا انا عايز حضرتك تقولى اعمل ايه بالضبط وانا ح نفذ بالحرف الواحد اللى حتقول عليه يعنى تقولى واحد اشتغل على كذا اثنين ادرس واشتغل على كذا ثلاثة روح اتعلم كذا الاول وهكذا

فا لو حضرتك تقدر تنصحنى اعمل ايه بالضبط اكون شاكر ليك

كل التحية