كلمات : عبد الفتاح مصطفى
الحان : أمين عبد الحميد
الزعبوط ( الشتا القاسى )
انا فى الزعبوط و الدفية
و البرد شديد و الله عليا
امال اش حال
جارى عبد العال
اللى ما جاب هدمة الشتوية
يللا يا عطعوط
خد له الزعبوط
و كفاية عليا الدفية
***
فى دك الليلة
انا و العيلة
قاعدين لمة
ماليين الدار
حوالين النار
و الدفا نعمة
جه فى بالى
قال لى يا خالى
اش حال ناسى
قاعد دافيان
ناسى العريان
و الشتا قاسى
ده انا فى الزعبوط و الدفية
و البرد شديد والله عليا
***
ربنا اعطاك
و النبى وصاك
على سابع جار
الشتا جه له
ما كسى عياله
و عياله صغار
و بدل ما تجيب
اربع جلاليب
اتنين يكفوا
و ادى الباقيين
لولاد تانيين
و قول ادفوا
ده انا فى الزعبوط و الدفية
و البرد شديد والله عليا
***
ده زمن خوان
و ملهوش امان
و معاك و عليك
قدم لغريب
فى الضيق و قريب
خيرك بايديك
شئ فاض و ناسيه
ولا مخبيه
خليه هدية
دى الهدمة الصوف
احسن معروف
فى الشتوية
ده انا فى الزعبوط و الدفية
و البرد شديد والله عليا
***
انا فى الزعبوط و الدفية
و البرد شديد و الله عليا
امال اش حال
جارى عبد العال
اللى ما جاب هدمة الشتوية
يللا يا عطعوط
خد له الزعبوط
و كفاية عليا الدفية
*****
__________________
قالوا لي... الناس معادن من أغلى المعادن
أنا قلت... الناس كنوز... دهب و ياقوت و ماس
و الحب أغلى معدن موجود في قلب الناس