[وائل علوي]

1.اعتذار للأستاذ عادل .. لأن انا عارف ان احنا عاملين دوشة في الركن الخاص بالنوتات بتاعته .. بس معلش هو قلبه كبير و هيستحملنا
2.انا استمعت ل عزف السيد وائل ل ( اهواك ) .. و استمعت بيها جدا .. ريشة انيقة و كلها احساس و هو دة اهم حاجة في المزيكا .. الاحساس .. الاخنلاف حول نص دييز طالع ولا ربع بيمول نازل مش هيكسر الدنيا .. خاصة لو بتلعب منفرد .. فا تحية ليك يا وائل و لعزفك الجميل

اخي ايهاب شكرا لك وكلك ذوق
مع اطيب تحياتي
اخى العزيز وائل واخوتى الاحباء
اكرر انا الجزء اللى عليه خلاف ده مش بيعتبر مقام , ولكن بيعتبر لعبة داخل مقام الصبا ولاحظ ان موسيقى الكوبليه مش من مقام الصبا ولكن عبد الوهاب بحب دايما المفاجئات .. يعنى انك تسمع مقدمة المفروض انها بتدخل فى مقام عشان الطبيعى ان المطرب بيغنى منه .. ولكن عبد الوهاب ممكن يوقعك فى الفخ ده يعنى يعمل مقدمة ويفاجىء بغنا فى سكة تانية ..
اما عن اللعبة او الفلزلة الفنية فى هذا الكوبليه عاملة زى حاجة فى الجيش اسمها هدف ثابت وهدف متحرك .. والهدف الثابت لما تطبقه على الموسيقى هو يعنى مقام .. وكلمة مقام او تحويل لمقام يعنى انك تكون فى مقام ما بعدين تعمل علامة تحويل صريحة تنقلك من المقام للمقام التانى ولازم انك تقعد فى المقام الجديد شوية لأنك لو دخلت المقام ودخرجت مباشرة ما تعتبرش تغيير مقام ولكن حلية او ماشابه والهدف المتحرك هو لمس علامات تديك ايحاء كاذب بمقام لكن مش بتثبت
والمشكلة ان الحركة اللى زى فى اللحن ده انها ماتتكتبش ... لأن ايه فائدة الكتابة ؟؟ انك بتكتب حاجة محددة ماحدش يختلف عليها ولكن بتتعزف سماعى وهنا برضو فيه مشكلة ان اللى يعزفها لازم يكون عازف حساس جدا جدا جدا يعنى بيحس بحاجة ويطلعها .. بمعنى ان لو عازف متوسط عزفها حاتطلع وحشة جدا ... وجدير بالذكر ايضا ان لولا عبد الحليم ماكان عبد الوهاب عمل حركة زى دى .. بعنى لو تلاحظ الحان عبد الوهاب لمطربين اقل من عبد الحليم بتلاقى اللحن كلو سالك مفيش الفزلكة دى .. لأنها لو طلعت نشاز او مش مضبوطة ده يب فى وش عبد الوهاب ... واقول برضو حاجة للذكرى والتاريخ ... المطرب المتمكن والعازف المتكمن بيقول الحركة الصعبة فى اى وقت واى مزاج .. لكن الغير متمكن ممكن مرة يقولها حاوة ومرة زى الزفت ... زى تلاميذ المدارس ( والكلام ده بيفهمو المدرسين ) يعنى عندك تلميذ ممكن يعزف مقطوعة مرة صح ومرة يغلط فيها .. انا ماعجبنيش الحوار بتاع انك لو صورتها من درجة كذا تطلع مقام كذا .. لأننا فى الفرقة الماسية عزفناها من مطرح ما انا كاتب ولازم انت تحسبها على هذا الأساس برضوعشان عدم اللخبطة
وللعلم عبد الوهاب والسنباطى بيقول اعزفها سماعى صح 100% بإحساسك ومتدخلنيش فى السفسطة الأكاديمية وقاولها قدامى مليون مرة والله العظيم السباطى قال لى كتير ان النوتة بتفقد الاحساس وكان بيحب يشتغل مع ام كلثوم اكتر واحدة عشان انها مش بتتعامل بالنوتة
مع اطيب تحياتى عادل صموئيل