اعشق جنون البحر وأعشق سكونه
وأتمنــى يبقــــى هوه أنا أو أكونـه
البحر هــش في وشي قال.....
يا ما فيك يا بحر حاجـات كتير مختفيــة
فيك لولي حر..و فيك نجوم منطفــــية
و أمواج عفية ..و القرار هادي عادي
أنا اللي فيك يا بحر والا انت فيا
تايه أنا ف بحـــــــــــر الحياة باتنفض
والموج بيعلا ف قلبــــــــي و بينخفض
نجم الطريق يشاورلي على ميت طريق
إيه تقبل منها و إيه يترفض ... ؟!
بين آه و لأ .. واخداني لحظـــــــــة قلق
ح اصرخ بعزم الصوت و أصحــي الملأ
إلا وبرق في البال خيال قال لي عيش
سلمت لك قلبي .. شراعي انطلق
ح تقوم يا موج ؟! و ماله ما أنـــــــا قمت لك
ح تروح .. تحمحم ..برضه حمحمت لك
معلوم يا موج ..ما هو انت علمتني
إنك ح تغدر بيا لو نمت ..لك
الموج ده ..و لا عرف خيل الجنون؟!
و لا ده شوق مطلــــــوق لعالم حنون ؟!
على فين يا موج يا حرون ؟ ضحك لي وقال:
ح اسيل في ليل الويل لشط المنون
مركب و بحر ..و واد و بنت ..وهوى
فجأة عوى الريح ..نجم مـــن فوق هوى
طلعنا نبكي ..كل حي في طريق
ليه يا حبيبتي الفرحة بتموت هوا ؟!
البحر قال لي اسمعني ..أنا مش ح اضلك
تبت في خلك ..هوه ده اللي فاضل لـــــك
أنا قلت خللي خلا بي ..قال: خللي بالـــك
تبت في خلك ..يعني تبت في ضلك
سوي سمك موسى ف زمن مش سوي
مسلم ده ولا مسيحي ..أو موسوي ؟!
با سأل أنا ..قام بص لي بنص عين !
فين الجواب ؟ قال ده سؤال مأسوي
شفت السمك في البحر داخل سبق
واللي بياكل أخوه ..واللي اتدبق
أنا قلت ليه بتاكلوا في بعض ليه ؟
و كلكم آخرتكو نفس الطبق!!
الرمل قال : سمعتو ا آخـــــــــر نبـــأ
الموج على الموج انطبق م الشبـــــــق
قال المحار : أهو ده اللي عاش الحياة
مش اللي زيي في القرار اختبأ
أحلى ما فيك ..إن انت دايما جديــــــــــــد
في لحظة صافي ..ولحظة جافي وشديـــد
والجرح يدبل فيك ..و أرض العباد
من الرقاد ع الجرح عبت صديد
"بتحبني يا بحر" ..قال "و انت ابني"
مصاحبني ..و شاربني ..و جنونك عاجبني
" طب ليه يا عيني " ..لسه ح أسأل لقيت
موجه ضاربني ..قالبني .."إيه ح تحاسبني"