[رائد عبد السلام]

(نور الفجر)

هــو نور الفجر شقشق ؟؟
واللا صوت عصفور و زقزق ؟؟
واللا دم ولادنا غرّق
الطغاة والمأجورين ؟
ربك أمـّا يريد ....يوفـّق
صدقوني ....مش مصدق !
كنا لما زمــان نفوت
ع الشوارع والبيوت
كنا نلقي العتمة هاجمة
والأمـــل خيط عنكبوت ...
بس كان الحق أصدق
صدقوني ...مش مصدق !
لما عزم ولادنا بان
في الشوارع ... والميدان
ضحكت الشمس اللي كانت
نورها مخنوق من زمان
قل: ما شاء الله كان
الإيمان هو اللي حقق
صدقوني مش مصدق !
العجايز والديابة
خلوا مصر الحلوة غابة
موّتوا ضحكة صغارنا
نشـّـفوا ريق السحابة
واتخرس صوت الربابة
آن أوان العمر يبدأ
صدقوني مش مصدق !