[رائد عبد السلام]

في الذكري الأولي لثورة يناير ...ثورة شباب مصر

(من وحي ثورة يناير )
إهداء إلي كل شاب مصري ثائر

غنوة مصرية

مع إن صــــوتك في الغـُـنا بيئنّ
مَحني علي عودك وشوقك بالأسي بيحنّ
ورغم إنك – سامحني – لسه حديث السنّ
لكن لقيتك في الميدان
حافظ مقامات الوطن
وباني بيعـللـّّي الجــدار
صدق اللي قال : الباني طــالع
وغيرُه علي باب النهار ... ينهار

عــذب وكلامك في القوالة سلسبيل
بــيرم في شمـــــس الأصـيل
دي مصـر ولادة وعفية عمرها ما تضن ّ
سمّعنا صــوتك فصيح
مليان غـُـنا و تباريح
تقولش نحلة ... وبحب الوطن بتزنّ

ياللي إنت غارف من تحانين الشجن
صـاحي ونومك عن هواك تخاطيف
أخضر وغصنك وريف
باسمع كلامك :
من عبير الحواري وشقشقات الريف
و سقّالات الشقا ويّـا الشروق طالعة
و زقزقات المغـارب في نزلة القلعة

والحلوة تدّاري بحياء .. بين مشربية وشيش
شارع مابين الرفاعي ومسـجد السـلطان
والنقشبندي بيصدح ويـّا صـوت الآدان

هنا الوطن ....هنا جنة الإنسان
هنا يتفتح لك باب وقلب ولسان

يقول مراحب ... بقلب يعصر حنان