[عادل صموئيل]

الأخت الفاضلة ليلى ابو مدين
اولا اسمحى لى اشكرك على طرح الموضوع
لكن الاخ عبد العزيز حامدى خلا الموضوع اتجه فى اتجاه تانى مش اتجاهه الصحيح
يعنى ممكن اوضح وجهة نظرى كموسيقار وكخبير بالذات فى التدوين الموسيقى
موضوعك اساساً كان مقال او سلسلة مقالات عن التدوين الموسيقى من الناحية النظرية , مش اصلا تعليم التدوين للى مش بيعرف يدون ( فاهمة قصدى ؟ ) , ونا قرأت مقالك وعجبنى وانتظرت انك تكلمى تانى وتانى وبعدين احط تعليقى او ازود معلومات من الناحية الثقافية مش من الناحية الموسيقية , بمعنى ان مقالك ده حلو للجميع , لعامة الشعب , وللموسيقيين , لكن تعليم التدوين ده موضوع تانى ... انا عارف انك مدرسة موسيقى , واكيد فى الكية اخدتى فى الصولفيج الإملاء اللحنية ... دى تعتبر بداية التدوين الموسيقى بس من غير موهبة ومؤهلات خاصة جدا ما ينفعش الواحد يدون موسيقى ... بمعنى ان تمرين الإملاء فى الكلية ده بيبقى سهل اوى محدود المستوى ( وطبعاً هنا انا بخاطب الجميع ) لكن عشان ندون اغنية لعبد الحليم او ام كلثوم ده موضوع تانى خالص ... وبعدين من كلام الاخ عبد العزيز حامدى انا حسيت انه مبتدىء ... والمبتدىء ممكن يتعلم يعزف لكن بعيد اوى انه يدون على الأقل دلوقتى
عشان الواحد يدون لازم تتوافر فيه عدة شروط اول شرط انه يكون بيقرأ نوتة اسرع من العربى عشر مرات
وتانى شرط انه يكون بيعزف سماعى بقدرة 100% يعنى اى جملة يسمعها مهما كانت صعبة ممكن يعزفها على طول
والشرطين دول مع بعض هم البداية ... والشرط التالت انه يكون موسيقى محترف يعنى اشتغل كعازف فى فرقة حلوة فترة , يعنى بيتحط قدامه كل يوم كذا ورقة نوتة بيقراهم قراءة فورية
بحيث توصل عنده الموسيقى زى اللغة العربية عند الجميع ... يعنى انا لما اسمع وانتى تملينى لغة عربية تخيلى انك حاتملينى كلمة موسيقى مثلا على طول وبدون بحث ومحص وتفكير حقول ميم واو سين قاف ياء ( وياء مش الف زى ما بتتسمع
يعنى انا مثلا بختلف عن كل الناس العاديين
اى واحد ممكن ينام على موسيقى هادئة ,,, انا لو نايموسمعت موسيقى حاصحى .. او لو جنبى راديو فيهموسيقى مش ممكن حنام ليه ؟ لما بسمع الموسيقى على طول بتتحلل حروف وايقاعات .. يعنى ام كلثوم مثلا لما بتغنى : ماخطرتش على بالك يوم انا مش بسمعها كده . بسمعها مقام راست و : دو دو ففا فا مى وهكذا بالطبع حتى لو كابس عليا النوم الحكاية دى بتخلى مخى يشتغل بأقصى طاقة والنوم يروح
انا نفسى لو عندك مقالات تانية كملى
مع اطيب تحياتى وىسف للإطالة وهدفى ان كل موضوع يعمل فائدة مش يروح اتجاه تانى