[عبدالباسط اقلاش]

رقـــــــــــــــــــــــــــــــــــ 4 ــــــــــــــــــــــــــــــــــــــــــــــــــ ـم
الجفارة و القطوس و ميليتي

الجفارة و القطوس و ميليتي ، أنواع من التبغ كانت رائجة بطرابلس و ليبيا عامة ، المهم هلي جاب الكلام ع التبغ حكاية عمنا الجزيري ، الله يرحمه كان من سكان الظهرة ، و يخدم على حاله و داير دكان يبيع فيه في كل شيئ ( يخترش ع حاله ) ، و مكانه ممتاز في وسط السوق ( مش عادي ) ، أي في الأربع شوارع المقابلة للسوق ، دكان صغير يسترزق منه .
في يوم من الأيام عمك الجزيري حزم أمره ، و نوي يكمل نص دينه ، جهز روحه ( لاد ع روحه ) ، و بدأت مراسم الفرح ، زي كل أفراح طرابلس ، ( هاوينها ) لا تغيب زكرة و لا دربوكة ، المهم ليلة الدخلة ، عمك الجزيري زفوه بنوبة مألوف مش عادية ، و لفت به في الشوارع ، و مرت بجوار قصر الوالي ( خلاص معاش في طريق إلا من قدام قصر الوالي ) ، فأنزعج الوالي من ضربات الطبول ، فنادى الوالي أحد حراسه :
الوالي : ما هذه الضجة ؟ و هذه الضربات ؟
أحد الحراس : الناس يا مولاي مبتهجين ، إنه عرس شعبي .
الوالي : عرس ؟ و عرس من ؟
أحد الحراس : إنه من عامة الناس يا مولاي ، أسمه الجزيري ، صاحب الدكان الصغير ، الموجود بالأربع شوارع .
الوالي : أحضره في الحال ، و ضعه في السجن إلي الغد .

و هكي عمنا الجزيري بات ليلة عرسه في السجن .