[سعدالشرقاوى]

هذه الصورة تم تصغيرها تلقائياً، قم بالنقر على هذا الشريط لعرضها بحجمها الأصلى. الأبعاد الأصلية للصورة: 640x480.
(أنا والقمر)
سعدالشرقاوى
بصّيت فى وشْ القمر عينى رأت تجاعيد
وناس كتير فى السما بتفكــّره بالعيد
قال ماضى منىّ يمين ما اظهر ولو ساعتين
وحبايبى متخاصمين ولاعادش سهرى يفيد
,,,,,,,,,
طلعت فوق السطوح وناديت عليه بالليل
كان أملى كتر النوح هايخلىّ قلبه يميل
والزّاى يكون قاسى وعمره ماكان ناسى
أتاريه شرب كاسى بايت وقلبه عليل
,,,,,,,,
وصّيت عليه النجوم باتت تصالح فيه
وتقول له ليه مهموم طاب قول لنا جرى ايه
يامجمّع العشــّاق على لهفة الأشواق
والكل لك مشتاق ياترى انت ساكت ليه
,,,,,,,,,
قام قال تعبنى السّهر نفسى أدوق النوم
ومرار قلوب البشر والجو كله غيوم
حتى الناس الحلوين فى هلالى متواعدين
من كام سنه نايمين طاب اعمل ايه يانجوم
,,,,,,,,,
دانا اللى كاشف عيوب الكل ومدارى
وبعينى شايف وساكت بس من نارى
صحّيت قلوب نايمين وصالحت متخاصمين
طلعوا اللى متفاهمين بيـبيعوا فى الشارى
,,,,,,,,,,
الظاهر انّ الزمن غيّر قلوب الناس
كان حب غالى التمن والقلب زىّ الماس
صبح الهدف مكشوف وماعادش فيها كسوف
وكتير نسوا المعروف وابن الاصول انداس
,,,,,,,,,