[عادل صموئيل]

الأخ العزيز منير
اشكرك على شعورك وكلامك الجميل وتعبك فى الموضوع
والشىء اللى احب اضيفه ان الفنان لما بيتوفى , بيتوفى بجسده بالنسبة لزملاءه , واصحابه ]عنى اللى اتعودوا يشوفوه وبيفتقدوه , يعنى انا شخصيا اشعر بالإفتقاد ده لكل نجووم الزمن الجميل اللى تعايشت معهم سنوات طويلة , والمرحومة سعاد محمد لما رحت معاها العراق اولا نزلنا فى بغداد ثم سافرنا للبصرة بطائرة خاصة , ثم ذهبنا للناصرية , وبعد ماعملنا الحفلات رجعنا لبغداد فى سيارة وكنت راكب بجوارها وقعدنا نتكلم طول الطريق اكتر من 4 ساعات وكانت بتحكى لى عن شقتها فى لبنان والشرائط بتاعتها , يعنى ممتلكاتها الموسيقية والاجهزة اللى عندها , وطبعا لما لقتنى من هواة وخبراء الاجهزة الكلام طول اوى , اما بالنسبة للجمهور الفنان مش بيموت ابداً , يعنى انت لما تسمع الراديو المذيعة بتقول تستمعون من فريد الاطرش او ام كلثوم او سعاد محمد الى اغنية كذا , وده نفس التقديم اللى كانت بتتقدم بيه الاغانى اثناء حياتهم , لذلك تحس انهم مازالوا موجودين , يعنى عمر ما المذيعة تقول تتمعون الى المرحوم او المرحومة فلانة , وده سلوك جميل من الاذاعة لأنها بتحس بالكلام اللى انا قلته هنا يعنى انهم بالنسبة للجمهور قبل او بعد ماتفرقش معاهم لأن تراثهم موجود
مع اطيب تحياتى