[عادل صموئيل]

احبائى
رحم الله الفنانة القديرة سعاد محمد , يعنى انا عزفت معها كثرا , وسافرت معها فى حفلات خارج الوطن عدة مرات
وهى الفنانة الوحيدة والتى شهد لها المرحوم رياض السنباطى انها رقم 2 بعد العظيمة ام كلثوم , وفيه سر احب تعرفوه , ان رياض السنباطى كان لما يعمل لحن لأى مطربة غير ام كلثوم او سعاد محمد , كان بيسجل اللحن مرة تانية على فرقة موسيقية بصوته , يعنى ام كلثوم وسعاد محمد فقط كان بيحس انه سجل اللحن كما ينبغى ان يكون للذكرى والتاريخ , لكن مع جميع المطربات كان بيسجل الالحن بصوته كى يطمئن انه ترك للتراث اللحن كما ينبغى ان يكون , وبعد وفاة ام كلثوم وضع السنباطى كل ما تبقى له من عبقرية لسعاد محمد وعمل لها عدة الحان , بينى وبينكم ممكن بعضها يكون مشاريع لم تتم لأم كلثوم , لكن رياض السنباطى كنت اشوفه لما بيسجل اى لحن بيحس بفخر واعتزاز بيحس ان الموسيقار اللى عمل اللحن ده عبقرى , وكنت بحس بالشعور ده لما اشوفه بيسمع لحن لأم كلثوم , ثم سعاد محمد , وبينى وبينكم لم ارى هذا الشعور 100% مع المطربات الأخريات كان بيحس ان فيه شىء ناقص
ومن هنا اقول لسعاد محمد الخالدة الله يرحمك يامدام سعاد , لقد اسعدتينا كثيرا , وانتى رحلتى بجسدك لكن صوتك باقى جميلا , خالداً طالما بقى للحياة بقية , وطالما بقى للسمع الجميل والطرب بقية ,
بس كنت اتمنى ان المنتدى ينزل لها صور احلى يعنى وهى صغيرة زمان للذكرى والتاريخ لأن اكيد وفى منتدى سماعى بالذات وهو بيت الطرب ان لسعاد محمد معجبين كتير جدا ويحبوا يحتفظوا لها بصور جميلة
مع اطيب تحياتى