[بشير عياد]

إلى أخي الأكبر
المهندس محمّد علـي
(( قناديلــــــي ))
وإلى الأصيل " المُزمن "
أخي محمد السلاموني
وكلِّ محبّي فنّ محمّد قنديل
*****************
************
*********
****
**
*
ـــــــــــــــــــــ

محمد قنديل
21 مارس 1929م
8 يونية 2004 م
ــــــــــــــــــــــــ
" يا حِلْو صَبَّح " على الصوت اللي أَمْتَعْنَا
وف ساعة الجدِّ يا ما قال وِجَمَّعْنَا
الكلمة ... أجمل كلام ... وف كلّ لون مَعْنَى
يا حلو صبحَّ وقول له يا " جميل واسْمَر "
يا بو الأغاني العَسَل ... يا ورد ... يا سُكَّرْ
إن كنت بتحبِّنا ... إحنا كمان أكتر
ف قلوبنا عايش وصوتك مالي أسماعْنا
******
من " الغوريّة " الجميل يحكي لنا " حَدُّوتة "
بالحب مِتْنَغَّمَة ... موزونة ع النُّوتة
علشان " بهية وياسين " وحسين وسَتُّوتة
الراديو يرقُص وهُوَّ بينقل الأخبار
والغنوة طالعة تقول النصر للأحرار
يا راديو زِفِّ الخبر وقولها " ع الدَّوَّار "
وفَرَّح النخل والتكعيبة والتُّوتة

طار الحمام في البَرَاح ... إعلا يا صوت قنديلْ
غَنِّي وِصَهْلِلْ وِجَلْجِلْ وابْدُرِ المَوَاويلْ
تطرح غيطانَّا أمل ... تمْلاَ الفَضَا الزَّغاليلْ
وقول " سماح " يا زمن ... كُنَّا مَعَاهْ ضَايعين
راح اللي راح وانتهى ... وِلسَّه ياما سنين
وبكره هو الطريق اللي احنا فيه ماشيين
وف كل شبر الأمل ... له " شِبَّاكين ع النيل
*****
فات " البطل " من هنا ... عايق ... و" إبن ذوات "
زي الخيال في المنام ... في لحظة عَدَّا وفات
يا " تمر حنَّة " الجناين ورد بالألوفات
إلا الحليوة " أبو شامة " بوردته البلدي
بيميل ... تميل القلوب ... يا عيني ع البلدي
الكل في الحال يردّد : " أحلى بلد ... بلدي "
وف لحظة نلقى الجميل ... باعت " 3 سلامات "

" رمش الغزال " لو رَمَشْ ... بيشعلل المواويل
والليل بيصبح غُنَا ... وتنوَّر القناديل
"مركب حبيبي " يطوف ... بالشوق واقول : يا ليل
ولما ترسي المراكب في " شاطئ الأسرار "
القلب يعزف نغم ... والليل يقول أشعار
والدندنات تنطلق ... توصل لسابع جار
ولو يمرّ الغزال ... بيقوم " صراع في النيل "

" البغبغان " ع الباب ... ينادي : بابا قنديل
وثومة تسمع غُناك ... وِتُفْرُكِ المنديل
عبد الوهاب ينسجم ... ويقول : دا فنّ أصيل
والغنوة طايرة بتفتح في الزمن شبابيك
وصوتك الماس يشاور للأحبة عليك
وتبقى غنوة أمل ع الصبح منقوشة
تشبه نسيم مصرنا ... وتشبهك يا جميل