أبريل 1970
و نبؤة صلاح جاهين التي تحققت
لا . . قولوا ورايا :
نـَهـَضَ
عـَبـَرَ
فـَتـَحَ
نـَصـَرَ
الدرس انتهى لموا الكراريس
ألحان : سيد مكاوي
غناء : شادية
___________
وَثـَبَ
قـَفـَزَ
قـَذَفَ
قـَتـَلَ
الدرس انتهى لِمّوا الكراريس
بالدم اللى على ورقهم سال
فى قصر الأمم المتحدة
فـ مسابقة لرسوم الأطفال
إيه رأيك فى البُقع الحمرا
يا ضمير العالم يا عزيزى
دى لِطفلة مصرية و سمرا
كانت من أشطر تلاميذى
دمّها راسم زهرة
راسم راية ثورة
راسم وجه مؤامرة
راسم خلق جبابرة
راسم نار
راسم عار
عـ الصهيونية و الاستعمار
و الدنيا اللى عليهم صابرة
و ساكتة على فعل الأباليس
الدرس انتهى
لِمُّوا الكراريس
وَثـَبَ
قـَفـَزَ
قـَذَفَ
قـَتـَلَ
إيه رأى رجال الفكر الحر
فى الفكرة دى المنقوشة بالدم
من طفل فقير مولود فى المر
إنما كان حلو ضحوك الفم
دم الطفل الفلاح
راسم شمس الصباح
راسم شجرة تفاح
في جناين الإصلاح
راسم تمساح
بألف جنــاح
فى دنيا مليانه بالأشباح
لكنها قلبها مرتاح
و ساكتة على فعل الأباليس
الدرس انتهى لِمُّوا الكراريس
وَثـَبَ
قـَفـَزَ
قـَذَفَ
قـَتـَلَ
إيه رأيك يا شعب يا عربى
رأيك إيه يا شعب الأحرار
دم الأطفال جايلك يحبي
يقول انتقموا من الأشرار
و يسيل على الأوراق
يتهجى الأسماء
و يطالب الآباء
بالتار للأبناء
و يرسم سيف
يهد الزيف
و يلمع لمعة شمس الصيف
فى دنيا فيها النور بقى طيف
و ساكتة على فعل الأباليس
الدرس انتهى لِمّوا الكراريس
وَثـَبَ
قـَفـَزَ
قـَذَفَ
قـَتـَلَ
لا . . قولوا ورايا
نـَهـَضَ
عـَبـَرَ
فـَتـَحَ
نـَصـَرَ
__________________
دَعْ عَنكَ تَعنيفي و ذقْ طعمَ الهوَى
فــإذا عَشِـقـتَ فبَـعـدَ ذلــكَ عَـنـِّـفِ