منتدى سماعي للطرب العربي الأصيل - عرض مشاركة واحدة

**Hisham Khala** · #**175** 22/02/2011, 17h45

اقتباس:

المشاركة الأصلية كتبت بواسطة Anitta

تحية طيبة لكل اعضاء المنتدى

الدكتور هشام الموضوع فوق الرائع بس ياريت حضرتك تكبر الخط لحسن كدة ها نتعمي لن الموضوع حلو بس الخط صغير قوي انا تعبت اوي على ما قراءتة و ارجو من حضرتك توضيح ماهو الماينر لانى مش عارفاه وحضرتك كاتب عنو كتير بس انا مش عالرفاة انا يمكن بعزفة بس مش عارفاة على النوتة وشكرا لك على الشرح الوافي للمقامات الغربية والشرقية وياريت لو عند حضرتك نوت او كتب تمارين اكتر زي فاتت جنبنا ويا نورا يا نورا لانها حلوة والهارموني بتعها حلو وياريت لو عند حضرتك نوت سهلة للمبتداين بس تكون بالتالفات
ياريت الدكتور هشام والاستاذ محمد الالاتى يبسطو كلامهم لان في كلام محدش يفهموا غير الدارس موسيقى وفاهم فيها كويس

تحياتي

عزيزتى انيتا
اولا انا عشان خاطرك بعد اذن الدكتور هشام قمت بتكبير الخط لأن انا كمان نظرى ضعيف شوية وبحب الخط يكون اكبر وانتى تامرى يعنى احنا عندنا كام انيتا
اما بالنسبة للسلم الماينر او المينور تعنى السلم الصغير , بإختصار فى الموسيقى الغربية كل سلم كبير ( ماجير )
له مجموعة من السلالم الصغيرة ( المينور او الماينر ) وطبعاً الموضوع ده محتاج سبورة لكن انا ممكن الخص لك ( او للجميع اهم جزء او معلومة ) :
لو عندك سلم كبير سلم دو مثلا
بيكون من دو ل دو ومفيش علامات تحويل فى الدليل
وبتكون اعاده واحد واحد نصف واحد واحد واحد نصف ( من اليسار طبعا )
اما سلم دو الصغير
بيكون من دو ل دو لكن به 3 علامات تحويل هى سى ومى ولا بيمول
بتكون ابعاده واحد نص واحد واحد نص واحد واحد من اليسار طبعاً

واول ملحوظة تحسيها ان السلم الكبير بيكون قوى اما السلم الصغير بيكون ضعيف او حزين ( او ممكن تقولى عاطفى شوية ) لذلك تلاقى السلم الكبير دائما بيكون فى الاغانى او الاناشيد الوطنية الحماسية لكن السلم الصغير بيكون فى الاغانى العاطفية عادة
ملحوظة السلمالكبير هو مقام العجم فى الموسيقى الشرقية
والسلم الصغير هو مقام النهاوند فى الموسيقى الشرقية
مع اطيب تحياتى عادل صموئيل

العزيزة Anitta
خالص تحياتي و تقديري
أنا تحت أمرك ، بس أنا بأكتب غالبا بخط كبير ، و أعذريني لو كتبت مرة بخط صغير (يمكن عشان طبيب عيون و بأعمل أختبار لنظر المتصفحيين )
بالنسبة للنوت الخاصة بالبيانو أنا بأعمل لها arrangement بمعني أني بأخللي اللحن في صورة مناسبة للبيانو ، و طبعا لازم تكون التآلفات مكتوبة بأحد الصور المناسبة للبيانو.
أنا غالبا كاتب الموضوعات بالتدريج ، يعني أبدئي من الأول ، و الموضوع اللي انت عارفاه انتقلي للموضوع الذي يليه ، بالطريقة دي ها تلاقي اجابات لتساؤلاتك كلها ، و كمان فيه موضوعات عن الهارموني و عن التأليف الموسيقي ستجدينها تحت باب "قواعد الموسيقي العربية" و كمان فيه دروس "الاستاذ عادل الصامت" تحت باب "أسئلة حول دروس الموسيقي" و هتلاقي دروس الاستاذ "سمير الجنحاني" في "شرح المقامات العربية" و طبعا دروس الاستاذ محمد الالاتي و طبعا نوت الاستاذ "عادل صموئيل" الذي أسس مكتبة تعتبر بحق مرجع للنوت الموسيقية للأغاني و الالحان المعاصرة
و لكونه عازف في الفرقة الماسية فستجدين تدوينه من المصدر و يتحلي بالتبسيط و البعد عن التعقيدات.
أحييك علي أجتهادك و حبك للموسيقي.

خالص التقدير و العرفان للأستاذ عادل صموئيل لقيامه بالرد و الشرح
و ألف مبروك لنجاح الثورة المصرية