رد: مصطفى سيد احمد
قمر الزمان
كلمات: صلاح حاج سعيد
ألحان: مصطفى سيد أحمد
كتبت ليك لا بيني لا بينك ريدة لا قصة غرام
اخترت ليك أجمل حروف وأصدق فواصل نادرة في لغة الكلام
لا قصدي ألهو معاك بكلمات غناء
لا شعري ليك مرجيحة من شعر الغمام
كتبت ليك والله يا قمر الزمان
شان جيتي بزمن المحنة وشفت في عينيكي حس أهلي القدام
كتبت ليك وأنا جاي من زمن الشقى المرسوم على وش الثواني مظللها
تتمدد الساعات سنين تتفتح الأحزان غريبة ومذهلة
وأشتاق أفتش نسمة في الزمن العذاب
وأيامي من كثر الأسى وكتر العزوف والاغتراب
صارت حروف مترهلة
لحظات اسيفة ومهملة
كتبت ليك ووقفت ليك لامن لقيتك جاية في قلب الطريق
ولمحت فيك راحة المشاوير البعيدة
ولفحة النسمة الحنينة الجاية من قلب المضيق
حسيت عجايب الدنيا اتلمت بقت جاياني من عصراً سحيق
عينيكي حس أطفال بنادو القمرة للغايب يعود
وجبينك الضَّواي حجى الحبوبة في الزمن السعيد
يا قمرة اقلبي السنسنى الحمرة شوفي شليل ما جا
يا قمرة اقلبي السنسنى الحمرة شوفي ليه ما جا
وأنا في قساوة الموحش الزمن المكهرب بالحريق
أنا حيلتي أيه؟ قولي لي يا قمر الزمان
غير أتكي وأحلم معاك
وأحضن أماسي الصحو والأمل البريق
|