كلمات : تاج الدين محمد
لحن واداء : حمدي السمر
ايامنا تجري سبق سبق
ولسه بنشخبط في الورق
ولسه موالفين الحروف
وكلامنا بي الاشواق مرق
***
احساسنا حاسس زي زمان
ماظنو طعم الريد فرق
وهواك قاعد في الصميم *
لافتو لا فات لا انسرق
***
قمري الغرام عاشقنا موت *
ونجمنا بين نجمين بَرَق *
سرب الهيام اختار اجيك
لو صادف الحد الغرق
حتي الطيور عرفت هواك
لامتين تعرف الريدة حق
***
لو حنّ قلبك مرة يوم
تلقانا لي عينيك حدق
تلقانا فارشين ليك قلوب
ونبُق راتاين الريدة بـَق *
ونوزع الريد في الفريق
غيمة ودعاشة طبق طبق
***
هامش :
قاعد = موجود
قمري = نوع من الطيور الحسنة الصوت
بَرق = من البرق اي وميض
رتاين جمع رتينة = وهي لمبة شعبية للاضاءة
نِبُق وبَق = ننور نولع
مع امنياتي انها تعجبكم
لاني اول مرة اتجراء وانشر احد اعمالي
في هذا المنتدي العظيم 