[abuzahda]

المشاركة الأصلية كتبت بواسطة سعدالشرقاوى

(هابيع صوتى)

يارب يعيدوا دايرتنا

وابيع صوتى تلات مرّات

وأفتح كـُشك ع الناصيه

واتاجر حبّه فى الأصوات
وابيع اسم اللى مات بجنيه
ماهم ماليـين لنا الكشوفات
وألحق م الفساد كومى
وأمسك عُمْلة الميّات
وايه فاضل مايتباعشى
وليه يعنى الضميربالذات
مانا بايع لهم بيتى
وساكن ترْبة الأموات
هابيع صوتى
,,,,,
هابيع وأقبض وأتريّش
وياكلوا بعض وانا مالى
لاشافنى شعب ولاشورى
ولا باين لهم حالى
لو اتوفـّر معايا جنيه
بتبقى الأم داعيالى
وماعرفش السياسه يابيه
بأقول والدنيا سمعالى
أنا همىّ أبات ليلة
معشىّ مراتى وعيالى
وابيع صوتى
,,,,,,
عشان خاطرك هاجيب مرتى
تروح اللجنه وتعيّط
دى شاطره وعندها الخبره
و طول العمر بتصوّت
وحاتعلــّم على أهلك
فى وسط الورقه وتشوّط
ولو يفضل لكم فكــّه
تروح الفرز وتزغرط
ونتعايق ونتْـثقــّف
وساعة النشره هانزيّط
وأشوفك مرّه بتسقــّف
أروح من فرحتى معيّط
ابيع صوتى
,,,,,,
ولو تدفع فلوس أكتر
أنوب عنـّك فى أىّ يمين
ساعة قسَمْ الولاء أطلع
أقولها وكلهم سامعين
بأنى أرعى مصالحهم
واحافظ ع البلد والدين
وخاصّيه فى محمولك
تقول ان احنا مش فاضيين
ياخوفى دورتك تخلص
ولسّه ماجبتش الملايين
وأسعار البشر تغلا
نجيب الصوت ساعتها منين
وابيع صوتى
,,,,,,,
حافـُضّ السيره واستسلم
وأقطع حبل أفكارى
واقول لك كلمة م الآخر
انا بايع مانيش شارى
أشوفلى عضو متريّش
أساعده عشان يبـيع دارى
وايه يعنى اللىّ أنا شايفه
يطفىّ لوعتى ونارى
دا حتىّ النيل ماهش كافى
عشان يغسل فى يوم عارى
وافوّض للاله أمرى
يخلــّص للولاد تارى
وابيع صوتى
,,,,,,
تعالى وادفع القرشين
تعالى واشترى الأموات
أنا ومراتى والولدين
فى أسرتنا تلات أصوات
ولو صوت الراجل باتنين
نقولوا عاشت القرارات
ونتمنى انّ كلّ يومين
نلاقى جولة انتخابات
وابيع صوتى
,,,,,,,,

هابيع صوتى وانا راضى
وفايق يعنى مش مسطول
ومش طامع فى توظيفى
ولاعايز أكون مسئول
انا محتاج لقوت يومى
وابيعلك كلّ شئ على طول
ياريت الصوت يوكلنى
رغيف واحد وحبّة فول
وابيع صوتى

بالذمّة يا خلق يا ناس يا هووووو

ده صوت يتباع و لو بكنوز الدنيا ؟

،

يا عم سعد .....
ياللي التوتة حداك خضرة في الاربع فصول ....

أبوس دماغك اللي "صوّتت" دي زجلة