[د أنس البن]

من أعمال وإبداعات الهويس الصعيدي هشام الجخ

قصيدة البغبغان

كان يوم مَطَر ..
البغبغان جُوَّا القَفَص
طَلَّع لِسانُه لعصفورين فوق الشجر ..
خَلِّيكو سايقين العناد ..
العِشّ قاد ..
وخسِرتُو ويَّاه الولاد ..
لَـمَّا انفَجَر ..
هو انتو حِمْل السِيل ؟؟
والا حِمْل المطر ؟؟
كان فيها إيه لو تِعْمِلُوا زيِّي
وتقولوا زَيّ ما يقول البَشَر ؟؟..

ردُّوا علِيه العصفورين :
لَوْ عَ الوِلاَد .. البَطْن ولاَّدة ..
والعِشّ مَهْمَا يقِيد ..
صخر الجبل عَنَاقِيد ..
نِفْرِشْهَا سِجَّادة ..
وانتَ اللي فرحان بالقَفَـص ..
أصْلَـك ( قَفَص ) !!..
كَتَمُوا الهوا جُوَّاك و نَسُّوك
إن ما بين الحياة والموت ..
نَفَس

----

قصيده انسحبوا

إنسحبوا
كان اللاسلكى بعيد
والعسكرى مسمعش
انسحبوا
شوفوا العجب يا ولاد
العسكرى مرجعش
إنسحبوا
أطرش دا ولا صنم
إرجع يا جندى بياده
دخل العدوا العريش
ارجع خلاص بزياده
العسكرى سامع
لكنه واد مجدع
شال اربجيهه وضحك
إشمعنا انا اللى ارجع
وقف الزمن مذهول ساعتين بيشاهد
الجندى قام كبر المدفع اتشاهد
الدبابات ظهرت
إرجع يا جندى نظام
دا كان كلام القياده
ودا برضوا وقت كلام
وقف الولد ددبان
ياساده يا سمعين
صادهم كما الدبان
محروس يا واد من العين
الدبابات صفين
اتفاجؤا وافترقوا
على كتفه كان مدفع
وعلى الجبين عرقه
غطاء العفار النار
ولا حد عاد شايف
والدبابات بتهل
ودا برضوا مش خايف
الضحكه على وشه متقولش بيصيف
ولسه الزمن واقف
مبسوط ومتكيف
الدبابات كترت
والكتره غلابه
والقلب لو مؤمن ولا ألف دبابه
هتقولوا مات الولد
أنا قولكم لاعاش
ما الجنه ولا فيها موت
ولا تدخل ببلاش

.......