أخي الكريم
الأستاذ حامد جودة
أشكرك على الرد
لكن مادمت صعيدي شهم كما وصفك أخي عادل فؤاد (حبيب عبد الوهاب)
و كما يبدو لي من حماستك (سواء هنا أو هناك)
فأنا من صعيد القاهرة ! (الساحل)
ساحل روض الفرج مش ساحل سليم !
ولا ساحل مصر عتيقة
،
و مادمنا طلعنا بلديات
و مادام المجال هنا يسمح بالأحاديث الجانبيّة
ممكن أطلب من حضرتك طلب ؟
ما تزعلش من الكلام اللي جاي .....
،
أنا رُحت على الوصلة اللي حضرتك تفضلت بنقلها إلى هنا ...
لاقيت الموضوع اللي أنشأه الأستاذ درش دارش
شيء جميل يدل على سعة معرفة و تواضع عارفين
ثم تلته مشاركتك الإنطباعيّة الحماسية
و هذا محمود و مقبول و منطقي من مُحب للأستاذ عبد الوهاب
لكني لاحظت من تاريخ مشاركتك ، أنه مضى عليها عام إلاّ أسبوع (!)
فلا الأستاذ درش دارش ، عقب عليها
ولا الموضوع أغرى أحد السماعيين بالمشاركة
رغم روعة إبتداءِهِ (..)
لماذا يا بلدياتي ؟
( إحنا اتفقنا مافيناش من الزعل )
إحنا في حرب ؟! يا عم حامد ؟
بذمتك يا راجل ، و احنا على النت و مش شايفين بعض
مش من حق أي حد يتخيّل حامد جودة واقف على باب الموضوع و مشمّر دراعه و ماسك زؤلة
طب الناس هتدخل ازاي ؟!
(خللي بالك ، إحنا اتفقنا مافيناش من الزعل )
،
عارف يا عم حامد
من كام يوم كنا بنتكلم في موضوع ...
هو أكثر مناطق الإختلاف إلتهاباً : السياسة
آهـ و الله سياسة في سماعي
لأ و سياسة مصر كمان
و ماحصلش حاجة من جو الغمز و اللمز ده
،
إحنا هنا يا بلدياتي علشان نقيم صداقات مش عداوات
و انت راجل زي الفـُل
بتغير على محبوبك (الأستاذ عبد الوهاب) لهذه الدرجة
يعني انت مكسب لينا نحن مجاذيب الأستاذ
،
ياراااااجل دانا بحسدك علشان انت في مصر
يعني ممكن بتليفون تقابل عمّنا الآلاتي
و انا مقضيها معاه تليفونات ، لمّا قرّبت اعمل قرض من البنك
،
خلـِّيك معانا هنا يا عم حامد
في تنظيمنا السِّري
المبدعون سابقاً
و أنا سعيد بصداقتك يا عم حامد
زؤلة :
العصاية الغليظة
اللي بتشفوها في
أفلام الرجولة المصرية
عن روايات عمّنا
نجيب محفوظ