[الرازي الجديد]

في البداية أود أن أتقدم بخالص شكري و امتناني لإدارة المنتدى الموقرة ، و ذلك لاهتمامهم و إدراجهم لمشاركاتي المتواضعة ضمن هذا المنتدى الجميل ، و اسمحوا لي بأن أستمر مع شعر الإبل لأقدم قصيدة شاعرنا الراحل نور الدين العزومي التي يقول في مطلعها:ا يا ما لاه يا بنت الإبل --- سيادك وين عدوا للعمل

يا ما لاه يا بنت الإبل

يا ما لاه يا بنت الإبل --- سيادك وين عدوا للعمل

يا ما لاه يا بن الحنينة --- سيادك وين عدوا للمدينة

بديو شبح زولك كارهينه --- ذاقوا الليم و ايكال الفجل

و كنتي قبل في زمزم و نينة --- و سي حران حيرانك همل

و كنتي قبل تطري سمينة --- يفوت الصيف ما يخشك رحل

خيار الكسب ياللي عارفينه --- اركوب الخيل و بنات الخول

و تبغي سيد ما يرفع عوينه --- يضرب ريم قدامك جفل

يقلك باطلة يجيبك سمينة --- تبدي كيف فرقان الحجل

رافع بندقة و الاريل عوينه --- يشرب بر من ثديك عسل

تبغي صقر ما يحنث يمينه --- ما تبغيش قراض البصل

مركب طنجرة و يقلب في عينه --- قبالة شبحته متعت فسل

غاب سنين ناسه فاقدينه --- حصل عمل يخدم في الدول

سيب عيلته و سيب جنينه --- كاسب صحته كيف الجمل

تبغي صقر ما يحنث يمينه --- ان جاك الغير يضرب ما يذل

جميلك بان وقتن ما مشينا --- قطعتي رمال و خشوم الجبل

وردتي بيار اميتهم ضنينة --- فيهم غير زرزور النحل

كسب البل بتعقب سنينه --- يا ما لاه يا بنت الإبل

اعتزنا فيك يا شينك غبينة --- داير كرهبة سيدك حصل

يبي النافطة يبي البنزينة --- انفلقت قومة ليها نزل

و جاء للمدن جوه ملاقيينه --- جاء عيان في الورشة انسبل

عشرة جنيه قالوله اعطينا --- مد اطناش على ربي اتكل

ركب و دار دورها هوينه --- خش في سرولة صابه خلل

و نور الدين ياللي عارفينه --- حصل عمل في الظاهر نزل

تبع عمل في الشركة هوينه --- كلا ناقته راحت ضلل

امالي الزرع هاللي راعيينه --- حطوا ناقته في فندق التل

وقتن جيتهم قالوا اعطينا --- هات فلوس و انطح هالجبل

في وسط المجزرة راسك هوينه --- سيادك زوفرو ذاقوا الغلل

يا ما لاه يا بنت الشنينة --- و البازين و وريق النخل

يا حضار صلوا على نبينا --- أنا استغفرت ما تقولوا جهل

للشاعر نور الدين العزومي رحمه الله