اقتباس:
المشاركة الأصلية كتبت بواسطة سعدالشرقاوى
|
(صرخة أجير)
سعدالشرقاوى
عاملالى سـاهيه وسـايبه الحــبل فى شـنافــى
وكعوبى رسمت شقوق فى الأرض وانا حافى
شايل ونافـك ألم ولا كانش عـــمره خفـــيف
عامل هناك تجويف بيحــــزّ فى كـــــــتافى
,,,,,
شامم عرق طميها والأرض محــروته
مكتوب تاريخ عمرها فى السّاقيه والتوته
شقــيان انا والبقر طول عمرى متعــلـّق
بقــــدم مفلــّق وعايش طافح الكـــوته
,,,,,
ظلمتى ليه قســـمتى يابلـــــدنا ياحرّه
وسقيتى أخويا العسل وانا حظىّ فى المرّه
ابنك لوحده وانا اللىّغريب فى وسطيكم
وتقيل عليــــكم كأنىّ خلــــفة الضـّرّه
,,,,,,
مليونه لعـبه ف ايديه وجنيهى معادينى
مش قادر احصل عليه الا بطلوع عينى
سكــّنتى جارى قصور وانا بالعيال مقهور
وحفرتى بنـّا بحور طاب مين يعدّينى
,,,,,,,
أهو ساق عليكى الهبل ملـّكتيه الفدادين
وأنا التزمت الأدب بيّعتينى القيراطين
وروحت أخدم جنابه مالتقيت مطرح
لو قلت أطفح باقيت عيلتى هياكلوا منين
,,,,,,
فى الاعداديّه فشل ابنه اللىّ أصبح بيه
وانا ابنى جاب لامتياز ماسألتى مرّه عليه
سفــّرته برّه نشر علمه فى حبل غسيل
وحجز عليه الكفيل بالأمر يخدم فيه
,,,,,,
ولحدّ امته المرض هايعيش على التسكين
مفعول علاجه انتهى بروشـتـّة للمساكين
طاب مانتى عارفه انّ عمر الضـّرب مايعلـّم
والطير بيرقص اذا اتألــّم من السـّـكــين
,,,,,,
من يوم ما مات الضمير فيكى ياست الناس
والعدل أصبح ضرير مشطوب من الكرّاس
سلــّمتى ليه السـّيادة لكلّ ندل عـــويل
وهان عليكى الأصيل تحت القدم ينداس
,,,,,,
يابلدنا عيدى القسوم ياللىّ ترابك خير
وماتـتهميش مظلوم خايف من التزوير
خللىّ المكافأة تساوى تعبى وشقايــه
يايكون عزايا انىّ مصرى عند أهله أجير
,,,,,,
مانا طبعى دغرى ونفسى ف كلمه واجعانى
ماقدرش اشيلها على نفسى اللىّ واخدانى
يظهرلى فيكى انّ حبىّ من طرف واحد
ياتصارحى نفسك تقولى انّ انتى كارهانى
,,,,,,,
[/QUOTE]
لوى دراعى وربطنى فى الساقيه
وهددنى يقلع قلوعى وانا باقيه
وكمم فمى وقالى اياكى تصرخى
وانا اخلى ابنك فى الطين يدور زى
الساقيه
سكت يابنى علشان تعيش
واعيش انا جمبك حزينه
الارض انت بتزرعها لتعيش
وهو يأكل العسل
والنحل يقرص فينا
بكيت لله كتير
يرحم ارضنا واهلينا
واصبحت أنت اجير
واصبحت انا بلد
بلا مينا
يا ابنى يا حته منى عايشه جوايا
قلبى بيدعيلك بالهنا وتزيل آسايا
العويل جه على دارنا وظلمك معايا
ان سكت هتعيش مستور وادى الحكايه
ولو اتكلمت يكون دمعى نزيل العمر كله
على خــــــــــــــــــــــــــــــــدايا
سبنا العويل يتحكلم فينا سنين ونعمل ايه
الصبر اخره زين ولازم نقوله يا بيه
والامل فى ابنك يخصلنى من ابن الايه
وتشرق شمس بكره عليك وعليه وعليه
بأمل جديد وارض خضره مزروعه 
حب وخُضره ليك وليه وليِه
اخى الكريم الاستاذ الاصيل
عمده كفر التوته الجميله
(((عم سعد الشرقاوى)))
وحشتنا
حكاويك والغناوى
ووحشنا جلوسنا بجوارك
تحت التوته
تحياتى لك ولقلمك المبدع دائما
لا حرمنا الله منك ولا من كلامك
ولا من شجرة التوته
يا عمدة كفر التوته
تحياتى دمت لى وللجميع بخير
اختك عفاف