اقتباس:
المشاركة الأصلية كتبت بواسطة Tarek Elemary
البيت الكبير
يا دار و مليانة فرحة
يا ذكرايات الحبايب
يا نخلة بالحب طارحة
شايلة نصيب اللى غايب
ضُليلة شِرحة و بِرحة
ياما دُوقْنا فيها الأطايب
كل الجِدور اللى سارحة
جامعة الجيران و النسايب
حُضْن القلوب المِسامحة
بيضُم كل القرايب
أبويا كان بانى صَرْحَه
و أنا قلبى فى ترابه دايب
***
الباب يلاقى الأحبة
و الضلفتين جناحين
ينفتحوا من بس دَبَّة
و لا مِحْتاجين مفتاحين
ورا سِحر عين نِستِخَبَى
بالورد و الرياحين
و لا يوم قَفَلْناه بِضَبة
ماهو أصلِنا ... فلاحين
الأب أدِّب و ربَّى
و مالى مخزن طِحِين
اللى مِحتاج جَهْ و عَبَّى
و لا كان سلف و لا دين
***
أهل الكرم همَّ أهلى
لو حتى سكنوا الزمالك
لا عمرى يوم أنسى أصلى
و لا قلبى حِمل المهالك
ياما ناس و عملوها قبلى
و أنا عمرى ما أبقى كذلك
صحيح من الطبع بأغلى
لكن دا عمك و خالك
ساعة الشدايد تمَلِّى
تلقى المدد كله جالك
شجرة و فروعها تِدَلِّى
ترويها بس بوصالك |
بسم الله الرحمن الرحيم
الشاعر الاسكندراني الكبير
الاستاذ طارق العمري
يا سلام يا سلام يا شاعرنا على بيت العيله واللمه والكرم
وحسن الضيافه
إيه الحلاوه دي كلها....مقطوعه شعريه جميله تلخص ما نفتقده
الآن من (لمة العيله في البيت الكبير) بعد أن فقدنا أعز الحبايب
وإفتقدنا السند لنا في الحياه بعد الله سبحانه وتعالى
وتفرقت بنا السبل الاخوه والاخوات كل في بلد بعيد كل البعد
عن الاخر
فجاءت قصيدتك لتذكرنا بما إفتقدناه من تجمع الاهل والاصحاب والجيران والاحباب جميعاً وبذكريات حلوه ليتها تعود.
سلمت يداك يا شاعرنا على ما نظمته من كلمات واضحه
سلسه ذات معاني غايه في الروعه
وفقك الله والى الامام دائماً
مع خالص تحياتي وتقديري واحتراماتي
ليلى ابو مدين
***