[بشير عياد]

إلى منعم ،،،، ((( غوّاص النغم )))


وإلى كلّ محبّي فنّ محمد فوزي

محمَّـــد فـــــوزي


((( 28 أغسطس 1918 م


20 أكتوبر 1966 م )))

" لِيَّا عَشَم وَيَّاك يا جميل "
يا صاحبِ القلب الطَّيِّبْ
العبقريّة مع الأخلاق
ولا شُفْنا فيك شيء يِتْعَيِّبْ
يا غنوة حلوة ف أيَّامْنا
زيِّ النسيم على خَدِّ النيلْ
ببراءة الأطفال عايشة
بضحكة صافية فْ وَجْهِ جميلْ
عاشق مُتَيَّم بحبيبته
يعزف لها ويقول مواويل
" بلدي أحْبَبْتُكَ يا بَلدي "
نغم أصيل من جيل إلى جيل
من طنطا من " كفر ابو جندي "
للقاهرة ... وِلْعُمر طويل
الغنوة دي " محمد فوزي "
" مكتوب عليَّا أحبّ واميل "
" لِيَّا عشم " يا " ابنِ الفلاَّح "
أرض الفنون تطرح تاني
شجر عظيم ومتين وأصيل
وأملنا أبدًا ما يْخَيِّبْ
***

" شحَّات غرام " ليل ويَّا نهار
مسكين بيشحت مواعيدُه
" الشوق " رماه على جمرة نار
مين فينا كان قلبه ف إيدُه ؟!
مين فينا يقدر يطفى النار
لو مَّرة صرخت في وريدُه ؟!
مين اللي يعرف أصل الشوق
ويقول لنا أيه بيقيدُه!!
دا حُكم مكتوب ع الأيَّام
ويوماتي ترجع وتعيدُه
واللي يفوز بِمعاد يا هَناه ...
يا فرحتُه
دا يوم عيدُه
الشوق ساعات بيكون نِعمة
نغم بنعشق ترديدُه
واللي بيخنق إحساسه
بإيده فيه أيه ح يفيدُه
بيعيش غريب في " ليالي الشوق "
ضحكاتُه تِشْبِه تَنْهِيدُه
يا شحَّاتين ... كُلِّنا مساكين
ولا قلب نال اللي يريدُه
***

الفجر لاح " عَصْفُور صَوْصَوْ "
وقال لنا " ذَهَبَ اللَّيْلُ "
يا للاَّ بقى إصحوا يا حلوين
وغنّوا وافرحوا واتمايلُوا
الشَّمْسِ طالَّة من الشبابيك
والصُّبح جَهْ مين ح يقابلُو ؟!
الضَّيَّ يضحك في الطُّرقات
كأنُّه كِنْز الليل شَايلُو
" عادل " بيبكي بْعِلْوِ الصوت
وباباه ومامتُه بيتحايلُوا
قال " اللبن " أنا ما اشربهوش
قوموا شوفوا عادل وعمايلُو
لكن " عصام " دَا وَلَد شطُّور
بيحسِّ بِبَابَاهْ وِجَمَايلُو
قال بكره لازم اكون طيَّار
أحمي الوطن أفديه بالروح
" وسُعاد " كمان بقت الأولى
ولا نِمْرة واحدة في يوم بتروح
عصافير على غُصن الآيام
في خيالنا ترقص وتخايلُو
***

ألله يا فوزي عليك ألله
يا عبقري ... يا جميل ... يا عظيم
ابن الأصول ... أبو قلب كبير ...
فلاح ومصري أصيل وصميم
" دايمًا معاك " عُمري ما بانساك
وكأنّ بيني وبينك سِيْم
زي الهرم صامد ورزين
ولا انحنيت رغم التأميم
وقلت " بلدي " دا فوق الكُلّ
وكنت وطني وكنت كريم
بتعيش عشان أحلام الناس
بضمير مُضِيءْ وبقلب سليم
ومبدأك إنكار الذات
مهما يكون الأمر أليم
الكل قال لك " صباح الخير "
" أيِ والله " تستاهل يا عظيم
و" فاطمة وماريكا وراشيل "
و" بنت حظ " بتحلم بيك
و" ليلى بنت الشاطئ " آَهِهْ
جايّه بتضرب لك تعظيم
تعظيم سلام ... أجمل تعظيم