رد: ريّسنا قال...ما فيش محال
انغام سبتمبريه
الشاعر / صلاح جاهين
اداء / سعاد حسنى
وقف الشريط فى وضع ثابت
دلوقت نقدر نفحص المنظر
مفيش ولا تفصيلة غابت
وكل شئ بيقول وبيعبر
من غير كلام ولا صوت
أول ما ضغط الموت
بخفة وبجبروت فى يوم أغبر
على زر فى الملكوت
وقف الشريط في وضع ثابت
دلوقت نقدر نفحص المنظر
أنظر تلاقى الراية منشورةْ
متمرغة لكن ما زالت فوق
بتصارع الريح اللى مسعورةْ
وانظر تلاقى جمال
رافعها باستبسال
ونزيف عرق سيال على القورة
وفـْ عنفوان النضال
وقف الشريط في وضع ثابت
انظر إليه شوف قبضته السمرة
وعيونه ثورة مكحلة بثورة
وصدره عرض الأرض حاضن مصر
والشام وليبيا وتونس الخضرة
والقصبة وفلسطين والأردن المسكين
والبحر والبساتين والصحرا
وف عز طحن السنين
وقف الشريط في وضع ثابت
انظر وشوف ع المهل بالراحة
الشمس وسط القبه قداحة
والناس بعيد فى الظل مرتاحة
ومصر واقفة صبية فلاحة
على كتفها بلاص
فيه ألف تقب رصاص
والمية منه خلاص
شلالها فى الرمل غاص
صبية حلوة كأنها تفاحة
لكنها من الحزن دابت
وسط السواد ندابة نواحةْ
ولما هل بطلها فى الساحةْ
بالحب والإخلاص
وقف الشريط في وضع ثابت
خلى المكنجى يرجع المشهد
عايز أشوف نفسى زمان وانا شب
داخل فى رهط الثورة متمرد
ومش عاجبنى لا ملك ولا أب
عايز أشوف من تانى واتذكر
ليه ضربة من ضرباتى صابت ؟
و ضربة من ضرباتى خابت ؟
و ضربة وقفت بالشريط فى وضع ثابت ؟
قال المكنجى : رجوع مفيش
عيش طول ما فيك أنفاس تعيش
وبص شوف ..
ركن الشباب فيه ألف مليون شب
انظر إليهم
وانت تتذكر .
__________________
[ 
اهيــة قامـــــت مصـــر بتقلـــــــع توب الـــــــــــــــذل
اهيــة صحيـــــة مصــر يا نـــــــــاس قـــدام الكـــــــل
بتنــــادى فى المخلصـيــــن نصـــــارة او مسلميــــــن
نبــــت الغيطـــــان والطــين والنيــــل بوشــــة يطــــل
النــيل مــلى الشــــوارع رايــــح فيهـــــا وراجـــــــــع
النيــــل كـــرة السكـــــوت بيخـــــــرج من البيـــــــوت
النيــــــــــــــــــــــــل على الارض جــــــــــــــــــــــارى
بيزحــــــف من الحــــــوارى ويحـــــاصر القصـــــــور
النيـــــل سمــع غنانــا النيل هتف معانا بأصغر الكفوف
وهية قامت مصر ام القاعدين وبتتعايق بهلال وصليب
والنـيــــــــل بيقــــــــــول يا صبــــــــــاح الفــــــــــــــل
|